पुणे : पुण्यातील मतदार यादीच्या विशेष पुनरीक्षण मोहिमेनंतर जिल्ह्यातील मतदारांच्या संख्येत मोठी घट झाली आहे. अनुपस्थित, स्थलांतरित, मृत आणि दुबार नाव असलेल्या सुमारे 28 लाख 69 हजार मतदारांची नावे यादीतून वगळण्याची प्रक्रिया सुरू आहे. यामुळे आधी 90 लाखांपेक्षा जास्त असलेली मतदारसंख्या आता सुमारे 62 लाख 10 हजारांवर आली आहे. मतदार कमी झाल्यामुळे जिल्ह्यातील मतदान केंद्रांची संख्यादेखील घटण्याची शक्यता आहे.
यापूर्वीच्या विधानसभा निवडणुकीत जिल्ह्यात 8 हजार 417 मतदान केंद्रे होती. त्यावेळी ग्रामीण भागात 1400 आणि शहरात 1200 मतदारांमागे एक केंद्र असे नियोजन करण्यात आले होते. मात्र, आता नव्या नियमानुसार सर्वत्र सरसकट 1300 मतदारांमागे एक केंद्र निश्चित केले जाणार आहे. जिल्हा निवडणूक शाखेने याबाबतचा प्रस्ताव राज्याच्या मुख्य निवडणूक अधिकाऱ्यांकडे पाठवला असून केंद्रीय निवडणूक आयोगाच्या मंजुरीनंतर यावर अंतिम निर्णय होईल.
दरम्यान, जर एखाद्या पात्र मतदाराचे नाव या मोहिमेत वगळले गेले असेल, तर 1 सप्टेंबरनंतर फॉर्म नंबर 6 भरून पुन्हा नाव नोंदवता येईल. त्यासाठी 2002 च्या मतदार यादीतील पुरावा देणे आवश्यक असेल. नवीन मतदारांना नाव नोंदणीसाठी शाळा सोडल्याचा दाखला किंवा अधिवास प्रमाणपत्र (डोमिसाईल) पुरावा म्हणून सादर करावा लागेल.
निवडणूक, मतदार नोंदणी किंवा मतदान केंद्रांशी संबंधित अधिकृत व अद्ययावत माहितीसाठी भारताचा निवडणूक आयोग किंवा महाराष्ट्राचे मुख्य निवडणूक अधिकारी यांच्या संकेतस्थळाला भेट द्या असे आवाहन नागरिकांना करण्यात आले आहे
