लोणी काळभोर, (पुणे) : लोणी काळभोर (ता. हवेली) येथील विजय बबनराव काळभोर यांना ‘क्रांतिसूर्य उत्कृष्ट पत्रकार’ पुरस्कार स्वाभिमानी शेतकरी संघटनेचे माजी खासदार राजू शेट्टी यांच्या हस्ते प्रदान करण्यात आला आहे.
जगदीशब्द फाउंडेशन व परिवर्तन सामाजिक संस्था यांच्या संयुक्त विद्यमाने वानवडी (पुणे) येथील महात्मा फुले सांस्कृतिक भवनात रविवारी (ता. २७) राज्यस्तरीय पुरस्कार सोहळ्याचे आयोजन करण्यात आले होते. यावेळी परिवर्तन सामाजिक संस्था महाराष्ट्र यांच्या वतीने ‘क्रांतिसूर्य उत्कृष्ट पत्रकार’ हा पुरस्कार देण्यात आला.
यावेळी पत्रकार श्रीरंग गायकवाड, वंचित बहुजन आघाडी प्रदेश उपाध्यक्षा दिशा पिंकी शेख, गोमाता ब्रिगेडच्या अध्यक्षा तृप्ती देसाई, प्रसिद्ध साहित्यिक नारायण सुमंत, व्याख्याते जगदीश ओहोळ, ज्येष्ठ विधीज्ञ उच्च न्यायालय मुंबईचे विजय कुरले, परिवर्तन सामाजिक संस्थेचे अध्यक्ष महादेव वाघमारे, आदी उपस्थित होते.
दरम्यान, विजय काळभोर हे मागील चार वर्षांपासून दैनिक पुण्यनगरी वर्तमानपत्रात प्रतिनिधी म्हणून काम करत आहेत. त्यांनी पत्रकारिता क्षेत्रात कार्यरत असताना अनेक विषयांना वाचा फोडून सर्वसामान्य नागरिकांना न्याय देण्याचा कायम प्रयत्न करीत आहेत. त्यांनी लेखणीच्या माध्यमातून समाजात जनजागृती केली आहे. विजय काळभोर यांच्या त्याच कार्याची दाखल घेऊन परिवर्तन सामाजिक संस्था महाराष्ट्र संस्थेने यंदाचा ‘क्रांतिसूर्य उत्कृष्ट पत्रकार’ देण्यात आला आहे.
