उरुळी कांचन, (पुणे) : “रागात का बघितले?” या किरकोळ कारणावरून दोन जणांनी एका रिक्षाचालकाला बिअरच्या रिकाम्या बाटल्यांनी व लाथाबुक्क्यांनी मारहाण करून जीवे मारण्याची धमकी दिल्याची घटना घडली. कोरेगाव मूळ (ता. हवेली) ग्रामपंचायत हद्दीतील कानकाटे वस्ती येथील जत्रा बार येथे शनिवारी (ता. 06) रात्री नऊ वाजण्याच्या सुमारास हा प्रकार घडला.
समुद्ध मोहन लोखंडे व राजेश बिबीशन म्हस्के (दोघे रा. उरुळी कांचन ता. हवेली जि पुणे) असे मारहाण करणाऱ्या दोघांची नावे आहेत. तर संतोष दादासो शिंदे (वय 34, धंदा रिक्षा चालक रा. तळवाडी शिवनगर, उरुळी कांचन, ता. हवेली) असे मारहाण झालेल्या रिक्षाचालकाचे नाव आहे. याप्रकरणी शिंदे यांनी दिलेल्या तक्रारीनुसार दोघांवर उरुळी कांचन पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी संतोष शिंदे शनिवारी रात्री नऊ वाजण्याच्या सुमारास कोरेगाव गाव मूळ गावच्या हद्दीतील कानकाटेवस्ती येथील ‘जत्रा बार’ येथे दारू पिण्यासाठी गेले होते. बारमध्ये बसले असताना, तिथे आधीच दारू पीत बसलेले आरोपी समृद्ध लोखंडे आणि राजेश म्हस्के यांनी फिर्यादी संतोष शिंदे यांना “तू आमच्याकडे रागात का बघितले?” असे म्हणत त्यांनी शिंदे यांच्याशी हुज्जत घालण्यास सुरुवात केली.
यावेळी दोन्ही आरोपींनी जत्रा बारमधील बिअरच्या मोकळ्या बाटल्या उचलून थेट संतोष शिंदे यांच्या डोक्यात घालल्या. तसेच बारमधील प्लास्टिकची खुर्ची उचलून उजवे बाजुच्या डावे गुडघ्या खाली मारली. यावेळी आरोपींनी फुटलेल्या बिअरच्या बाटलीची काच संतोष शिंदे यांच्या उजव्या बाजूच्या कंबरेवर जोरात मारली.
दरम्यान, कंबरेत काच घुसल्याने शिंदे हे गंभीर जखमी झाले. जखमी अवस्थेत पडलेल्या शिंदे यांना दोन्ही आरोपींनी लाथाबुक्क्यांनी बेदम मारहाण करत शिवीगाळ केल्याचे फिर्यादीत म्हटले आहे. याप्रकरणी दोघांवर गुन्हा दाखल करण्यात आला असून तपास पोलीस अंमलदार लगस करीत आहेत.
