पुणे : राज्यातील अनाधिकृत शाळासंदर्भात विधिमंडळ अधिवेशनात तारांकित प्रश्न उपस्थित करण्यात आला होता. या प्रश्नावर राज्याचे शालेय शिक्षण मंत्री दादा भुसे यांनी उत्तर दिले आहे.राज्यातील ३८८ खासगी शाळा अनधिकृतरीत्या चालवल्या जात असल्याची माहिती त्यांनी दिली. त्याचबरोबर पिंपरी चिंचवड महापालिका क्षेत्रातील २२ अनधिकृत शाळांपैकी ११ शाळा बंद करण्यात आल्या आहेत. तर उर्वरित सहा शाळांना मान्यता मिळाली असून, पाच शाळांना इरादापत्र प्राप्त झाल्याची माहिती ही शिक्षण मंत्र्यांनी दिली आहे.
गेल्या दोन वर्षात शासनाद्वारे घेतलेल्या विशेष मोहिमेद्वारे 117 शाळा बंद करण्यात आल्या आहेत.ठाणे जिल्ह्यात प्राथमिकच्या 64, माध्यमिकच्या 24 अशा एकूण 88 अनाधिकृत शाळा चालवल्या जात आहेत. त्यापैकी 41 शाळावर गुन्हा दाखल करण्यात आला असून अनाधिकृत शाळा बंद करण्याची कार्यवाही शिक्षणाधिकारी यांच्याकडून सुरू आहे. अनधिकृत शाळांवर कारवाई करण्याचे निर्देश शासन स्तरावरून वेळोवेळी देण्यात आले आहेत. तसेच लातूर जिल्ह्यातील अनाधिकृत शाळेवर नियमानुसार दंड ही आकारण्यात आला असल्याची माहिती शिक्षण मंत्र्यांनी दिली.
विधिमंडळ अधिवेशनात अतुल भातखळकर, मिहीर कोटेचा, नाना पटोले, संजय उपाध्यक्ष, अस्लम शेख यांच्यासह काही आमदारांनी राज्यातील अनाधिकृत शाळा संदर्भात प्रश्न उपस्थित केला. या प्रश्नावर शालेय शिक्षण मंत्री दादा भुसे यांनी उत्तर दिले.शिक्षण आयुक्तांच्या 18 जुलै 2023 च्या पत्रानुसार राज्यात अनाधिकृत 661 शाळा चालवल्या जात होत्या. दरम्यान 2013 नंतरच्या बेकायदा सुरू असलेल्या शाळा अधिनियमातील तरतूदीचे पालन करत असल्यास संबंधित शाळांच्या प्रस्तावावर तरतुदीनुसार कार्यवाही करण्याच्या तसेच निकषाचीं पूर्तता करत नसलेल्या शाळा बंद करून विद्यार्थ्यांचे जवळच्या शाळेत समायोजन करण्याच्या सूचना देखील देण्यात आल्या आहेत, असे शिक्षण मंत्री दादा भुसे यांनी स्पष्ट केले.
