Uddhav Thackeray : राज्यात अनेक ठिकाणी गारपीठ, आणि अवकाळी पाऊस पडत आहे. राज्य सरकारने यावर काय केलं? राज्य सरकारवर टीका केली की, मुख्यमंत्री गळा काढतात. मी गरीब शेतकऱ्याचा मुलगा आहे. त्यावर माझे काहीच म्हणणं नाही. पण, अशी पंचतारांकीत शेती राज्यातील सर्व शेतकऱ्यांना मिळावी, अशी उद्धव ठाकरे यांनी मुख्यमंत्री एकनाथ शिंदे यांच्यावर केली आहे. ते मुंबई येथे आयोजित पत्रकार परिषदेत बोलत होते. (CM Eknath Shinde)
पुढे बोलताना उद्धव ठाकरे म्हणाले, पावसाने शेतकऱ्यांचं मोठं नुकसान झालं आहे. गारपिटीमुळे द्राक्ष आणि कांद्यांचं नुकसान झालं आहे. यंदा महाराष्ट्रात दुष्काळही आहे आणि आता अवकाळीही त्यामुळे राज्यावरचं संकट काही कमी होत नाही. काल एक शेतकरी मंत्र्यांना म्हणाला की, तुम्ही मदत करणार असाल तर भेटायला या नाहीतर निघून जा.
महाराष्ट्र उघडा पडलाय, गारपीट झाली आहे, शेतकऱ्याची वाताहात झाली आणि तुम्ही तेलंगाणात प्रचाराला जाता, लाज नाही वाटत..आणि मग स्वतःच्या पंचतारांकित शेतीबद्दल सांगता. हवामान खात्यानं इशारा दिला होता की, या काळात अवकाळी पाऊस पडेल मग सरकारनं काय केलं?
‘बळीराजा संकटात आणि मुख्यमंत्री प्रचारात मग्न
राज्याचे मुख्यमंत्री एकनाथ शिंदे सध्या तेलंगणा राज्याच्या दौऱ्यावर असून निवडणुकीचा प्रचार करत आहेत. या दौऱ्यावर उद्धव ठाकरे यांनी जोरदार टीका केली आहे. म्हणाले, ‘बळीराजा संकटात आणि मुख्यमंत्री प्रचारात मग्न, आज त्यांची खरी गरज शेतकऱ्यांना आहे. शेतकऱ्यांवर अस्मानी संकट कोसळलेले असताना स्वत:ला गरीब शेतकऱ्यांचा मुलगा म्हणणारे मुख्यमंत्री तेलंगणा राज्यात निवडणुकांच्या प्रचाराला गेले आहेत.
बळीराजाला वाऱ्यावर सोडून मुख्यमंत्री दुसऱ्या राज्यात गेले आहे. शेतकऱ्यांची वाताहत झाली आहे, अशी परिस्थिती असताना आपले राज्य सोडून दुसऱ्या राज्यात जायला लाज नाही वाटत, अशा शब्दात उद्धव ठाकरेंनी मुख्यमंत्री एकनाथ शिंदेवर चांगलाच निशाणा साधला आहे.
राज्यातील जनतेला तुमचे दर्शन कधी होणार ?
मुख्यमंत्री आणि पंतप्रधानांना इतर राज्यांमध्ये प्रचार करण्यास, अश्वासनांची रेवडी उडवायला जातात. त्यासाठी त्यांना वेळ असतो. पण, तुमचा हात राज्यातील शेतकऱ्यांच्या पाठीवर कधी फिरणार? दुसऱ्या बाजूला भारतीय जनता पक्ष देशभरात अश्वासने देतो आहे, आम्ही हे गॅस स्वस्तात देऊ, आमूक स्वस्तात देऊ, रामलल्लाचे दर्शन मोफत करु. पण, ते दर्शन होईल तेव्हा होईल. राज्यातील जनतेला तुमचे दर्शन कधी होणार आहे? असा सवाल उद्धव ठाकरे यांनी केला आहे.
