पुणे : विधासभा निवडणुकीची घोषणा झाल्यापासून सर्वत्र नाकाबंदी करण्यात आली असून तपासण्या देखील सुरु झाल्या आहेत. निवडणुकीच्या काळात पैसे आणि गैरव्यवहार होऊ नये यासाठी कडक नियोजन प्रशासनाकडून करण्यात आले आहे. असं असताना पुण्यातील सहकार नगर पोलीस ठाण्याच्या हद्दीत पुणे पोलिसांच्या नाकाबंदीदरम्यान 138 कोटींचे सोने पकडले आहे. आज (दि. २५) सकाळच्या सुमारास सातारा रस्त्यावर ही मोठी कारवाई पोलिसांनी केली आहे.
पुण्यातील सहकार नगर पोलीस ठाण्याच्या हद्दीत नाकाबंदी करण्यात आली होती. यावेळी पुणे पोलिसांनी एका संशयित वाहनाची झडती घेतली असता त्यामध्ये हे सर्व सोन्याचे दागिने सापडले आहे. मात्र, हे सोनं नेमकं आलं कुठून, कुठे जात होतं? कोणाचं होतं याचा तपास आता पोलीस करत आहेत.
निवडणुकीच्या पार्श्वभूमीवर पुण्यात जागोजागी पोलिसांनी नाकाबंदी केली असून संशयित वाहनांची तपासणी केली जात आहे. त्या पार्श्वभूमीवर पोलिसांनी हे 138 कोटी रुपये किंमत असलेले सोन्याचे दागिने जप्त केले आहेत. प्राथमिक माहितीनुसार, डिलिव्हरी ट्रान्सपोर्टची असण्याची शक्यता पोलिसांनी वर्तवली आहे.
