अहमदनगर : पर्यटनासाठी आलेल्या पर्यटक मुलीचा दुर्दैवी अंत झाल्याची माहिती समोर आली आहे. अकोले तालुक्यातील पर्यटकांना आकर्षित करणाऱ्या सांदण व्हॅलीत ही घटना घडली. रविवारी सकाळी अकराच्या सुमारास या परिसरात निसर्गसौंदर्य पाहण्यासाठी तरुणींचा समूह आला होता. आलेल्या समूहातील एका तरुणीचा सांदण व्हॅली पाहत असताना पाय घसरला आणि मृत्यू झाला.
ऐश्वर्या खानविलकर (वय 29 वर्षे) असं तिचं नाव आहे. दगडावर डोके आपटून तिचा दुर्दैवी मृत्यू झाला. तरुणी मुंबईतील दहिसर परिसरातील आहे. पाणलोट क्षेत्रातील साम्रदजवळील सांधण दरीत ही घटना घडली. सलग सुट्ट्यांमुळे सध्या राज्यातील सर्व पर्यटनस्थळे हाऊसफुल्ल असल्याचं चित्र आहे. त्यामुळे भंडारदरा धरण परिसरात पर्यटकांची गर्दी वाढली आहे.
निसर्ग पाहत असताना ऐश्वर्याचा एका दगडावरुन पाय घसरला. त्यामुळे ती सुमारे दहा ते पंधरा फूट खाली पडली. दुर्दैवाने एका खडकावर तिचे डोके आपटल्याने तिचा जागीच मृत्यू झाला. मयत तरुणीचा मृतदेह अकोले ग्रामीण रुग्णालयाकडे पाठवण्यात आला आहे.
