पुणे : राष्ट्रवादी काँग्रेस पक्षाचे (अजित पवार गट) नेते पार्थ पवार यांनी शरदचंद्र पवार पक्षाचे सर्वेसर्वा शरद पवार यांची मुंबईत अचानक भेट घेतली. ‘सिल्वर ओक’ या शरद पवारांच्या निवासस्थानी बुधवारी रात्री पार्थ पवार दाखल झाले. या दोन्ही नेत्यांमध्ये तब्बल 3 तास एकांतामध्ये प्रदीर्घ चर्चा पार पडली.त्यामुळे या दोघांमध्ये नेमकी काय चर्चा झाली याकडे राजकीय वर्तुळाचे लक्ष लागले आहे.
गेल्या काही काळापासून राष्ट्रवादी काँग्रेसचे दोन्ही गट पुन्हा एकत्र येण्याबाबत आणि विलीनीकरणाबाबत तर्कवितर्क लावले जात आहेत. शरद पवारांचा गट केंद्रात एनडीएमध्ये सहभागी होऊ शकतो, अशीही चर्चा रंगली आहे. तसेच काही दिवसांपूर्वीच शरद पवार गटाच्या खासदारांनी पंतप्रधान नरेंद्र मोदी यांची भेट घेतली होती; ही भेट मतदारसंघातील समस्या मांडण्यासाठी होती असे स्पष्ट करण्यात आले असले, तरी या पार्श्वभूमीवर आजोबा-नातवाच्या बैठकीला विशेष महत्त्व प्राप्त झाले आहे.
जेष्ठ नेते शरद पवार -पार्थ पवार या दोघांच्यातील 3 तासांच्या प्रदीर्घ संवादात दोन्ही पक्षांच्या संभाव्य विलीनीकरणाच्या अटी, शर्ती आणि राज्यातील आगामी राजकीय समीकरणांवर सविस्तर विचारविनिमय झाला असावा, असा अंदाज राजकीय विश्लेषकांकडून व्यक्त केला जात आहे. या अनपेक्षित भेटीमुळे येणाऱ्या दिवसांत राज्यात मोठे राजकीय फेरबदल पाहायला मिळतात का, याकडे सर्वांचे लक्ष लागले आहे.
दरम्यान पार्थ पवार त्या भेटीनंतर रात्री साडे अकराच्या सुमारास तेथून बाहेर पडले. या दोन्ही नेत्यांमध्ये नक्की काय चर्चा झाली, याबाबत कोणतीही अधिकृत घोषणा दोन्ही बाजूंकडून करण्यात आलेली नाही. मात्र, या गुप्त बैठकीमुळे महाराष्ट्राच्या राजकीय वर्तुळात अनेक प्रकारच्या शक्यता आणि चर्चांना उधाण आले आहे.
