पुणे : हडपसरमधील भगीरथनगरमध्ये पादचारी तरुणाचा मोबाइल चोरट्यांनी चोरून नेण्याचा प्रयत्न केला. मात्र, तरुणाने चोरट्यांना विरोध करताच चोरट्याने त्याला फरफटत नेऊन हाताला चावा घेऊन सुटका करून घेतली. त्यानंतर तरुणाचा मोबाइल चोरून चोरट्यांनी धूम ठोकली. याप्रकरणी तरुणाने हडपसर पोलीस ठाण्यात फिर्याद दिली. पोलिसांनी सांगितले की, तक्रारदार तरुण हडपसर भागातील भगीरथीनगर परिसरात राहायला आहे.
शुक्रवारी (दि. २० डिसेंबर) रात्री साडेआठच्या सुमारास पादचारी तरुण भगीरथीनगर परिसरातून निघाला होता. सोसायटीकडे वळत असताना दुचाकीवरून आलेल्या चोरट्यांनी तरुणाचा मोबाइल चोरण्याचा प्रयत्न केला. तरुणाने त्यांना विरोध केला, तसेच चोरट्यांना रोखण्याचा प्रयत्न केला. त्या वेळी चोरट्याने तरुणाला २०० ते ३०० मीटर अंतरापर्यंत फरफटत नेले. दुचाकीस्वार चोरट्याबरोबर असलेल्या साथीदाराने तरुणाच्या हाताचा चावा घेतला. झटापटीत तरुणाच्या गुडघ्याला दुखापत झाली. तरुणाकडील मोबाइल संच चोरून चोरटे पसार झाले. या घटनेची माहिती मिळताच सहायक पोलीस आयुक्त अश्विनी राख, वरिष्ठ पोलीस निरीक्षक संतोष पांढरे यांनी घटनास्थळी भेट दिली. पोलीस उपनिरीक्षक अर्जुन कुदळे तपास करत आहेत.
