भिगवण : शेटफळगडे (ता. इंदापूर) येथील प्राथमिक आरोग्य केंद्रातील शासकीय औषधसाठ्यातून औषधे आणि साहित्य चोरीला गेल्याचा प्रकार उघडकीस आला आहे. याप्रकरणी त्याच आरोग्य केंद्रात कार्यरत असलेल्या महिला वैद्यकीय अधिकाऱ्याविरोधात भिगवण पोलीस ठाण्यात गुन्हा दाखल करण्यात आला आहे. सीसीटीव्ही फुटेजमध्ये संबंधित वैद्यकीय अधिकारी औषधांची पिशवी भरून दुचाकीवरून नेताना दिसत असल्याचा दावा तक्रारीत करण्यात आला आहे.

याप्रकरणी शेटफळगडे प्राथमिक आरोग्य केंद्रातील वैद्यकीय अधिकारी डॉ. स्नेहल सुरेश थोरात यांनी फिर्याद दिली आहे. त्यानुसार, डॉ. स्नेहल राजेंद्र कारंडे यांच्याविरोधात शासकीय औषधसाठ्यातील औषधे कोणतीही नोंद न करता आणि वरिष्ठांची परवानगी न घेता नेल्याचा आरोप करण्यात आला आहे.
पोलिसांत दिलेल्या माहितीनुसार, औषधनिर्माण अधिकारी मनिषा बिसेन यांनी औषधसाठा तपासला असता मोठ्या प्रमाणात औषधे कमी असल्याचे त्यांच्या निदर्शनास 3 नोव्हेंबर रोजी सकाळी आली. त्यानंतर आरोग्य केंद्रातील सीसीटीव्ही फुटेज तपासण्यात आले. त्यामध्ये रात्रीच्या पाळीवर असलेल्या डॉ. कारंडे या औषधांच्या खोलीतून पिवळ्या रंगाच्या डिस्पोजेबल पिशवीत गोळ्या व औषधे भरताना आणि त्यानंतर ती पिशवी दुचाकीवरून घेऊन जाताना दिसत असल्याचे फिर्यादीत नमूद केले आहे.

तसेच, 2 नोव्हेंबर रोजी रात्री डॉ. कारंडे यांनी त्यांच्या आजारी आई-वडिलांसाठी औषधे घेण्याबाबत औषधनिर्माण अधिकाऱ्यांना फोन केला होता. त्यावेळी रजिस्टरमध्ये नोंद करून औषधे घेण्यास परवानगी देण्यात आली होती. मात्र, दुसऱ्या दिवशी तपासणी केली असता औषध वितरणाची कोणतीही नोंद आढळली नाही. औषधसाठ्याची पडताळणी केली असता सलाईन, मधुमेहावरील गोळ्या, प्रतिजैविके, ताप व वेदनाशामक औषधे, जीवनसत्त्वांच्या गोळ्या, ओआरएस पाकिटे, इंजेक्शन आणि पल्स ऑक्सिमीटर अशा एकूण 17 प्रकारच्या औषधे व साहित्याची कमतरता आढळली. त्यांची एकूण किंमत 4 हजार 57 रुपये 70 पैसे असल्याचे तक्रारीत नमूद करण्यात आले आहे.
या प्रकाराची तालुका वैद्यकीय अधिकारी आणि जिल्हा आरोग्य अधिकाऱ्यांना लेखी माहिती देण्यात आली होती. त्यानंतर खातेअंतर्गत चौकशी करण्यात आली. चौकशीअंती जिल्हा आरोग्य अधिकाऱ्यांनी कायदेशीर तक्रार दाखल करण्यासाठी डॉ. थोरात यांना प्राधिकृत केले. त्यानुसार त्यांनी भिगवण पोलीस ठाण्यात धाव घेतली. या प्रकरणी पोलिसांकडून पुढील कायदेशीर कारवाई अपेक्षित आहे.






