दौंड : दौंड तालुक्याचे आमदार अॅड. राहुल कुल यांच्या वाढदिवसानिमित्त दुष्काळग्रस्त बांधवांच्या मदतीसाठी तब्बल ४९ लाख रुपयांची देणगी जमा करण्यात आली आहे. ‘आमदार राहुल दादा कुल मित्र मंडळा’च्या वतीने जमा झालेल्या या रकमेचे धनादेश मुख्यमंत्री देवेंद्र फडणवीस यांच्याकडे सुपूर्द करण्यात आले. मुख्यमंत्री सहायता निधीच्या माध्यमातून या रकमेचा वापर दुष्काळग्रस्तांच्या मदतीसाठी केला जाणार आहे.

आमदार राहुल कुल यांच्या वाढदिवसानिमित्त दुष्काळग्रस्त बांधवांना मदत करण्याचे आवाहन करण्यात आले होते. या आवाहनाला हितचिंतक, नागरिक, समाजबांधव आणि कार्यकर्त्यांनी उत्स्फूर्त प्रतिसाद दिला. त्यांच्या सहभागातून एकूण ४९ लाख रुपयांची रक्कम जमा झाली.
या सर्व देणगीचे धनादेश राज्याचे मुख्यमंत्री देवेंद्र फडणवीस यांच्याकडे सुपूर्द करण्यात आले. संकटकाळात दुष्काळग्रस्तांना मदत मिळावी, या उद्देशाने हा सामाजिक उपक्रम राबविण्यात आला.

या उपक्रमात सहभागी होऊन दुष्काळग्रस्त बांधवांच्या मदतीसाठी हातभार लावणाऱ्या सर्व हितचिंतकांचे आणि कार्यकर्त्यांचे ‘आमदार राहुल दादा कुल मित्र मंडळा’च्या वतीने आभार व्यक्त करण्यात आले. समाजातील नागरिकांनी एकमेकांना संकटकाळात साथ दिल्याने या उपक्रमाला मोठा प्रतिसाद मिळाल्याची भावना मंडळाने व्यक्त केली.
याबाबत आमदार राहुल कुल म्हणाले, “संकटाच्या काळात बळीराजा आणि दुष्काळग्रस्त बांधवांच्या मदतीसाठी धावून जाणे हे आपले प्रथम कर्तव्य आहे. माझ्या एका आवाहनाला प्रतिसाद देत मित्र मंडळाचे सर्व कार्यकर्ते आणि हितचिंतकांनी जो विश्वास व आपुलकी दाखवली, त्याबद्दल मी सर्वांचा मनःपूर्वक आभारी आहे.”






