पुणे : सुश्रुषेसाठी ठेवलेल्या कामगाराने पुणे शहरात यापूर्वी चोरी, तसेच ज्येष्ठांना लुटल्याच्या घटना घडल्या आहेत. अशीच एक घटना नवीन वर्षाच्या पहिल्याच दिवशी घडली आहे. सेवा सुश्रृुषेसाठी ठेवलेल्या एका तरुणाने ज्येष्ठाला दोरीने बांधून त्यांच्याकडील रोकड आणि मोबाइल संच पळवून नेल्याची घटना घडली. ही घटना शहरातील कोरेगाव परिसरात घडली आहे. त्यामुळे सुश्रुषेसाठी मुलाला किवा मुलीला ठेवायचे कि नाही? याचा नीट विचार करावा लागणार आहे.
याप्रकरणी पसार झालेल्या तरुणाविरुद्ध पोलिसांनी गुन्हा दाखल केला आहे. चिंटू चतुर्वेदी (वय १९, रा. मध्य प्रदेश) असे गुन्हा दाखल करण्यात आलेल्या तरुणाचे नाव आहे. याबाबत एका व्यावसायिकाने कोरेगाव पार्क पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, तक्रारदार व्यावसायिक घोरपडीतील सोपानबाग परिसरात राहण्यास आहेत. त्यांचे वडील कोरेगाव पार्क भागातील अग्रसेन सोसायटीत राहातात. त्यांची सुश्रुषा करण्यासाठी आरोपी चतुर्वेदीला ठेवले होते. बुधवारी (दि. १) त्याने ज्येष्ठाला चाकूचा धाक दाखवत पैसे न दिल्यास जीवे ठार मारण्याची धमकी दिली.
तसेच त्यांचे हात दोरीने बांधून त्यांच्याकडील ३२ हजारांची रोकड आणि मोबाइल संच काढून घेत चोरटा पसार झाला. सायंकाळी व्यावसायिक वडिलांची विचारपूस करण्यासाठी घरी गेले. तेव्हा सुश्रुषेसाठी ठेवलेल्या चतुर्वेदीने वडिलांना चाकूच्या धाकाने लुटल्याचे उघडकीस आले. त्यानंतर त्यांनी कोरगाव पोलीस ठाण्यात तक्रार दिली त्यानुसार पोलीस पसार झालेल्या आरोपीचा शोध घेत आहेत.
