शिरुर : शिरुर तालुक्याच्या बेट भागात मृग नक्षत्रातील पावसाने हजेरी लावली आहे. सतत पडणाऱ्या पावसाने व बदललेल्या हवामानाने रुग्णांच्या संख्येत वाढ होऊ शकते. त्यामुळे आरोग्याची काळजी घेण्याचे आवाहन आरोग्य विभागाकडून केले जात आहे.
आपल्या घरामध्ये पाणी साठवण्यासाठी असणारे बॅरल, हौद, रांजण, सिंटेक्स टाक्या, ज्यात आपण पाणी साठवून ठेवतो. पाणी पिण्याचे असो किंवा वापरायचे असो आठवड्यातून किमान एकदा सदर भांडी म्हणजे कंटेनर घासून त्यानंतर ते कोरडे करून धुवावेत. जेणेकरून डासांच्या मादीने घातलेली अंडी नष्ट होतात. हे केल्यामुळे आपल्या घरामध्ये डासांची निर्मिती होणार नाही.
त्याचबरोबर घराच्या अवतीभोवतीचा संपूर्ण परिसर स्वच्छ करावा. तसेच घराच्या टेरेसवर आपण ठेवलेल्या टाकाऊ वस्तू उदाहरणार्थ कलरचे रिकामे डबे, टायर, मडके, पक्षी यांना पिण्यासाठी ठेवलेले भांडे, गाडगे, भंगार साहित्य या वस्तूंमध्ये सुद्धा पाणी साठवून डेंग्यूच्या डासांची निर्मिती होते. म्हणून आपण या वस्तू पालथ्या घालाव्यात किंवा अडोशाच्या ठिकाणी पुन्हा पाणी साठले जाणार नाही अशा ठिकाणी ठेवाव्यात.
डेंग्यूची लक्षणे –
तीव्र ताप, थंडी, डोकेदुखी, अंगावर लालसर चट्टे किंवा पुरळ तसेच चिकनगुनिया मध्ये वरील लक्षणे दिसून येऊन सोबत संपूर्ण शरीराच्या सांध्या मध्ये तीव्र वेदना होणे. पेशंट वाकून चालतो आणि दम लागतो. कृपया सदर लक्षणे आढळल्यास आपल्या शासकीय यंत्रणेच्या दवाखान्यामध्ये रक्ताची तपासणी करून निदान करावे. त्याचबरोबर भरपूर पाणी पिणे, आराम करणे, किवी, ड्रॅगन फळ यासारखी फळ खावीत. आपल्या कार्यक्षेत्रातील असणाऱ्या आशा स्वयंसेविका यांना कळवून माहिती द्यावी.
डेंग्यू व चिकुनगुनिया हे दोन्ही आजार एकाच डासाच्या मादीमुळे म्हणजे एडीस या डासामुळे हे आजार होतात. या डासाच्या अंगावर पांढरे पांढरे ठिपके असतात, म्हणून त्याला टायगर मॉस्किटो असे संबोधले जाते. हा डास दिवसा चावणारा असून त्याच्या गुणगुण करण्याचा आवाज बिलकुल येत नाही, म्हणून त्याला सायलेंट किलर सुद्धा म्हणतात. या आजारामध्ये पेशंटला लक्षणानुसार उपचार दिला जातो.
आपल्या गावातील उकिरडे जे पावसाळ्यात दिवसांमध्ये मोठ्या प्रमाणात त्यामध्ये पाणी साठून राहते त्याच बरोबर आपल्या घराभोवताली तुंबलेली गटारे त्याचबरोबर प्रत्येकाकडे असणा-या या शौचालयाच्या खालील टाकीमध्ये व्हेंटलेशन पाईप द्वारे डासाची मादी अंडी घालण्यासाठी खालील टाकीमध्ये उतरते. हजारो प्रमाणामध्ये या ठिकाणी डासांची वाढ होत असते. म्हणून आपण शौचालयाच्या व्हेंट पाईपला वरील बाजूने रुमाला सारख्या सुती कापड बांधावे, जेणेकरून शौचालयाच्या टाकीमधील तयार झालेले डास बाहेर येणार नाहीत. आणि नव्याने अंडी घालण्यासाठी हे डास आत जाणार नाही. दर सहा महिन्यातून एकदा हे कापड बदलावे.
कृपया वरील सर्व सांगितलेल्या गोष्टी व त्यासाठी कारावयाच्या च्या उपयोजना लक्षात घेऊन कराव्यात ही विनंती आणि इतरांना ही माहिती पाठवून जागृत करावे.
– डॉ. नामदेव पानगे- वैद्यकीय अधिकारी, प्राथमिक आरोग्य केंद्र, टाकळी हाजी- ता.शिरुर, जि.पुणे.
