बारामती, ता. 21 : बारामती विधानसभा पोटनिवडणुकीच्या प्रचाराची सांगता मंगळवारी शारदा प्रांगणात एका ऐतिहासिक आणि भावूक वातावरणात पार पडली. या सभेत खासदार सुप्रिया सुळे यांनी महायुतीच्या उमेदवार सुनेत्रा पवार यांना आपला पाठिंबा जाहीर केला असून, बारामतीकरांना त्यांना विक्रमी मतांनी निवडून देण्याचे आवाहन केले आहे. “अजितदादांनी 35 वर्षे बारामतीची सेवा केली, आता त्यांच्या पश्चात वहिनींना साथ द्या,” अशी साद सुळे यांनी घातली.
या सांगता सभेला महायुतीसह राष्ट्रवादी काँग्रेसचे दिग्गज नेते आणि मंत्री उपस्थित होते. यावेळी सुप्रिया सुळे म्हणाल्या की, “शरद पवार यांनी 60 वर्षे आणि त्यानंतर अजित पवारांनी 35 वर्षे बारामतीचा विकास केला. ही निवडणूक बिनविरोध व्हावी अशी माझी मनापासून इच्छा होती. मात्र, आता महाविकास आघाडीच्या वतीने आम्ही सुनेत्रा वहिनींना पूर्ण पाठिंबा देत आहोत. बारामतीचा प्रत्येक कार्यकर्ता आणि मतदार त्यांनाच मतदान करेल, याची मला खात्री आहे.”
भाषणादरम्यान अजित पवार यांच्या विमान अपघाताची आठवण सांगताना सुप्रिया सुळे भावूक झाल्या होत्या. “जेव्हा पार्थचा फोन आला की डॅडींचे प्लेन कोसळले आहे, तेव्हा माझा विश्वासच बसत नव्हता. मला ते अपघातग्रस्त विमान पाहण्याचे धाडसही झाले नाही. दादा त्या विमानात नसतील किंवा ते सुखरूप बाहेर येतील, अशी आशा मला वाटत होती,” असे सांगताना त्यांना गदगदून आले होते. अजितदादांची उणीव भासत असताना सुनेत्रा पवार, पार्थ आणि जय ही जबाबदारी मोठ्या हिमतीने सांभाळत असल्याचे त्यांनी नमूद केले.
बारामतीची शान जपण्याची नैतिक जबाबदारी
सुप्रिया सुळे पुढे म्हणाल्या की, “गेली सहा दशके बारामतीकरांनी शरद पवारांना साथ दिली आहे. आता ही परंपरा आणि बारामतीची शान जपण्याची नैतिक जबाबदारी आपल्या सर्वांवर आहे. अजितदादांचे स्वप्न पूर्ण करण्यासाठी सुनेत्रा वहिनींच्या पाठीशी खंबीरपणे उभे राहा.” सर्वात जास्त वेळा निवडून येण्याचा ऐतिहासिक मान यावेळी बारामतीकरांना मिळणार असल्याचा विश्वासही त्यांनी व्यक्त केला.
विक्रमी मतदानाचा विश्वास
निवडणूक जाहीर झाली त्याच दिवशी ती बिनविरोध करण्याची मागणी मी केली होती, असे सांगत सुळे यांनी काही उमेदवारांचे अर्ज अद्याप कायम असल्याबद्दल खेद व्यक्त केला. मात्र, तरीही या निवडणुकीत बारामतीकर विक्रमी मतदान करून सुनेत्रा पवारांना विजयी करतील, यात शंका नसल्याचे त्यांनी ठामपणे सांगितले.
