पुणे : प्रसिद्ध अभिनेत्री सोनाली बेंद्रे मराठी सिनेविश्वातुन नवी सुरुवात करणार आहे. तिची पहिली निर्मिती/प्रस्तुती असलेला ‘सोहळा’ हा मराठी चित्रपट 16 ऑक्टोबर रोजी संपूर्ण महाराष्ट्रात प्रदर्शित होणार आहे. आशा, जिद्द आणि माणसाच्या मनातील सकारात्मक ऊर्जेवर भाष्य करणारी ही एक अत्यंत हृदयस्पर्शी कथा आहे.
‘रोज मुव्हीज’ आणि ‘कॅरीऑन फिल्म्स’च्या बॅनरखाली या सिनेमाची निर्मिती करण्यात आली असून, सचिन श्रीवास्तव, रत्ना श्रीवास्तव व कविता बागबान हे याचे निर्माते आहेत. तर साईकत बागबान यांनी या चित्रपटाचे लेखन आणि दिग्दर्शन केले आहे.प्रादेशिक चित्रपटांच्या वाढत्या प्रभावाच्या काळात ‘रोज मुव्हीज’ या निर्मिती संस्थेने ‘सोहळा’च्या माध्यमातून मराठी चित्रपटसृष्टीत पाऊल ठेवले आहे. भाषेच्या सीमा ओलांडून प्रेक्षकांच्या थेट हृदयाला भिडणाऱ्या आणि दर्जा जपणाऱ्या सशक्त कथा सादर करणे, हा या स्टुडिओचा मुख्य उद्देश आहे. स्थानिक कलाकारांच्या साथीने प्रभावी कथा प्रेक्षकांपर्यंत पोहोचवण्याचा त्यांचा हा प्रयत्न कौतुकास्पद आहे.
आपल्या या नव्या प्रवासाबद्दल बोलताना सोनाली बेंद्रे म्हणाली, “प्रस्तुतकर्ती म्हणून हा माझा पहिलाच चित्रपट असल्यामुळे तो माझ्यासाठी खूप जवळचा आहे. चित्रपट संपल्यानंतरही ज्या कथा प्रेक्षकांच्या मनात घर करून राहतात आणि त्यांना विचार करायला भाग पाडतात, अशाच कथा मला नेहमी आकर्षित करतात. ‘सोहळा’ची पटकथा ऐकताच माझे या कथेशी एक अनोखे नाते निर्माण झाले.”
तीने पुढे सांगितले की, “गेल्या काही वर्षांत आशा, चिकाटी आणि सामान्य माणसातील अंतर्गत ताकद या गोष्टी माझ्यासाठी खूप महत्त्वाच्या बनल्या आहेत. म्हणूनच नव्या प्रवासाचा श्रीगणेश करण्यासाठी ‘सोहळा’ हा उत्तम चित्रपट ठरला. या माध्यमातून नव्या आणि गुणी दिग्दर्शकांना एक चांगले व्यासपीठ मिळवून देण्याचा माझा प्रयत्न राहील. मी या कथेचा जो अनुभव घेतला, तोच आनंद आणि अनुभूती प्रेक्षकांना चित्रपटगृहात मिळेल अशी मला पूर्ण आशा आहे.”
