पुणे : करमाळा तालुक्यातील वांगी 1 परिसरातील जाधव वस्ती येथे विहिरीत बुडून आई आणि तिच्या 2 वर्षांच्या चिमुकल्या मुलीचा दुर्दैवी मृत्यू झाला असल्याची धक्कादायक घटना घडली आहे. ही घटना शुक्रवारी दुपारी 1:30 वाजेच्या सुमारास समोर आली.
नेमकी घटना काय घडली?
लोकविकास डेअरीच्या रस्त्यावरील जाधव वस्तीवर राहणाऱ्या शिल्पा सागर जाधव (वय 28) आणि त्यांची मुलगी ऋता सागर जाधव (वय 2) या दोघी शुक्रवारी घरीच होत्या. शिल्पा यांचे पती सागर जाधव हे सकाळी औषध आणण्यासाठी टेंभुर्णीला गेले होते, तर त्यांची सासू शेतातील कामासाठी बाहेर पडली होती. शिल्पा यांचे सासरे आजारपणामुळे घरातच होते.
दुपारी कुटुंबीय जेवणासाठी घरी परतले असता, आई-मुलगी घरात कुठेही दिसल्या नाहीत. त्यामुळे नातेवाईकांनी तातडीने आसपास शोध सुरू केला. घरासमोरील विहिरीत चिमुकल्या ऋताची चप्पल तरंगताना दिसल्याने सर्वांच्या पायाखालील जमीन सरकली. गावकऱ्यांनी त्वरित मदतीसाठी धाव घेतली. विहिरीत पाणी जास्त असल्याने 3 मोटर पंपांच्या साहाय्याने पाणी उपसण्यात आले. स्थानिक तरुणांनी पाण्यात उतरून शोध घेतला असता, आधी 2 वर्षांच्या ऋताचा आणि त्यानंतर थोड्या वेळाने शिल्पा यांचा मृतदेह हाती लागला.
मिळालेल्या माहितीनुसार, लहानगी ऋता खेळता खेळता विहिरीजवळ गेली आणि अचानक आत पडली. तिला वाचवण्यासाठी आई शिल्पा यांनी कसलाही विचार न करता थेट विहिरीत उडी घेतली. मात्र, शिल्पा यांना पोहणे येत नसल्यामुळे त्याही पाण्यात बुडाल्या आणि माय-लेकीचा अंत झाला.
घटनेची माहिती मिळताच करमाळा पोलिसांनी तातडीने घटनास्थळी पोहोचून पंचनामा केला. दोन्ही मृतदेह शवविच्छेदनासाठी करमाळा उपजिल्हा रुग्णालयात पाठवण्यात आले असून, या दुर्दैवी घटनेमुळे संपूर्ण वांगी परिसरात हळहळ व्यक्त केली जात आहे.
