पुणे : पुण्यातील डेक्कन जिमखाना परिसरातील कॅफे फ्लाईंग जिप्सीमध्ये १९ वर्षीय तरुणावर कोयता आणि इतर शस्त्रांनी जीवघेणा हल्ला केल्याची धक्कादायक घटना समोर आली आहे. या प्रकरणी डेक्कन पोलिसांनी खुनाच्या प्रयत्नाचा गुन्हा दाखल केला असून, प्रसिद्ध रील क्रिएटर माधवी कुंभार हिच्यासह सात जणांना अटक केली आहे.
नेमकी घटना काय?
पोलिसांनी दिलेल्या माहितीनुसार, अथर्व प्रमोद जगताप (वय १९, रा. आंबेगाव) हा शनिवारी १५ ऑगस्ट रोजी पहाटे सव्वातीनच्या सुमारास शिरोळे रोडवरील कॅफे फ्लाईंग जिप्सीमधून बाहेर पडत होता. त्यावेळी काही जणांनी त्याचा पाठलाग करत त्याला अडवले.
‘तू पोरींना काय बोलला? आमच्यासोबत चल, तुला दाखवतो,’ अशी धमकी देत आरोपींनी अथर्वला शिवीगाळ करण्यास सुरुवात केली. घाबरलेल्या अथर्वने जीव वाचवण्यासाठी पुन्हा कॅफेमध्ये धाव घेतली. मात्र, आरोपींनी त्याचा पाठलाग करत कॅफेत प्रवेश केला.
‘याला जिवंत सोडू नका’ म्हणत हल्ला
कॅफेमध्ये शिरल्यानंतर आरोपींनी ‘याला जिवंत सोडू नका’ असे म्हणत अथर्ववर शस्त्रांनी हल्ला केल्याचा आरोप आहे. त्याच्या डोक्यावर वार करण्यात आले. तसेच खुर्च्या फेकून मारत आणि लाथाबुक्क्यांनीही मारहाण करण्यात आली. या हल्ल्यात अथर्व गंभीर जखमी झाला.
जुन्या वादातून हल्ल्याचा संशय
पोलिसांच्या तपासात या हल्ल्याचे कनेक्शन साताऱ्यातील जुन्या वादाशी असल्याचे समोर आले आहे. अथर्व आणि आरोपी तरुणी एकमेकांच्या परिचयाचे असल्याची माहिती आहे. काही महिन्यांपूर्वी साताऱ्यातील कास पठार परिसरात स्टंटबाजी करताना कारला कट मारल्याच्या कारणावरून दोन्ही गटांमध्ये वाद झाला होता. याच जुन्या वादातून पुण्यात अथर्ववर हल्ला करण्यात आल्याचा पोलिसांना संशय आहे.
View this post on Instagram
रील क्रिएटर माधवी कुंभारसह सात जणांना अटक
हल्ल्यानंतर अथर्वने डेक्कन पोलीस ठाण्यात जाऊन तक्रार दाखल केली. घटनेचे गांभीर्य लक्षात घेऊन पोलिसांनी तातडीने तपास सुरू केला.
या प्रकरणात रील क्रिएटर माधवी कुंभार (रा. काळेपडळ, हडपसर), स्नेहल सोनके (रा. पिंपळे गुरव) आणि शार्दुल ओव्हाळ (रा. हडपसर) यांच्यासह एकूण सात जणांना अटक करण्यात आली आहे. त्यांच्यासोबत असलेल्या आणखी ७ ते ८ अज्ञात साथीदारांविरोधातही गुन्हा दाखल करण्यात आला आहे.
डेक्कन पोलिसांकडून या प्रकरणाचा पुढील तपास सुरू असून, हल्ल्यामागील नेमके कारण आणि इतर आरोपींची भूमिका तपासली जात आहे.
