अक्षय टेमगिरे
Shirur News शिरूर, ता. २३ : आधीच कांद्याला कवडीमोल दर मिळाल्याने शेतकरी आर्थिक संकटात सापडले असताना, कांदा विक्रीचे पैसे हरवल्याने हवालदिल झालेल्या एका शेतकरी महिलेसाठी शिरूर पोलिसांनी मानवतेचा आदर्श घालून दिला आहे. अवघ्या दीड ते दोन तासांत महिलेची रोख रक्कम आणि महत्त्वाची कागदपत्रे असलेली पर्स शोधून परत मिळवून दिल्याने शिरूर पोलीस स्टेशनचे पोलीस हवालदार नाथा साहेब जगताप यांचे सर्वत्र कौतुक होत आहे. Shirur News
मिळालेल्या माहितीनुसार, संबंधित महिला शिरूर मार्केट यार्डमध्ये कांदा विक्री करून मिळालेले पैसे पर्समध्ये ठेवून दुपारी सुमारे चार वाजण्याच्या सुमारास बसस्थानकाच्या दिशेने निघाली होती. यावेळी शिरूर बसस्थानकासमोरील गतिरोधकाजवळ दुचाकीवरून जात असताना तिची पैशांनी व महत्त्वाच्या कागदपत्रांनी भरलेली पर्स नकळत रस्त्यावर पडली. Shirur News
काही वेळानंतर पर्स हरवल्याचे लक्षात येताच महिला घाबरून गेली. कांद्याचे पैसे हरवल्याने तिच्यासमोर मोठे संकट उभे राहिले होते. दरम्यान, ती पर्स एका प्रामाणिक जोडप्याला सापडली. त्यांनी ती स्वतःजवळ सुरक्षित ठेवली.
पर्स हरवल्याची माहिती मिळताच शिरूर पोलीस स्टेशनचे पोलीस हवालदार नाथा साहेब जगताप यांनी तात्काळ तपासाची सूत्रे हाती घेतली. परिसरातील विविध सीसीटीव्ही फुटेज तपासत त्यांनी त्या जोडप्याचा शोध घेतला आणि त्यांच्याशी संपर्क साधला. पोलिसांच्या तत्परतेमुळे अवघ्या काही तासांत पर्सचा शोध लागला. Shirur News
यानंतर संबंधित जोडप्याने प्रामाणिकपणा दाखवत ती पर्स शिरूर पोलीस स्टेशनमध्ये जमा केली. शिरूर पोलीस स्टेशनचे पोलीस निरीक्षक संदेश केंजळे यांच्या हस्ते संबंधित शेतकरी महिलेला तिची पर्स परत देण्यात आली. तसेच प्रामाणिकपणा दाखवणाऱ्या जोडप्याचेही पोलिसांकडून अभिनंदन करण्यात आले. Shirur News
कठीण परिस्थितीत असलेल्या शेतकरी महिलेसाठी पोलीस हवालदार नाथा साहेब जगताप हे अक्षरशः देवदूत ठरले असून, त्यांच्या तत्परतेमुळे महिलेला मोठा दिलासा मिळाला आहे. या संपूर्ण घटनेमुळे शिरूर तालुक्यात पोलिसांच्या मानवतेच्या चेहऱ्याची चर्चा रंगली असून, “पोलिसांमध्ये अजूनही संवेदनशीलता जिवंत आहे,” अशा भावना नागरिक व्यक्त करत आहेत.
