पिंपरी चिंचवड : बसचालक आणि प्रवाशाच्या भांडणाचा भन्नाट व्हिडीओ सध्या समाज माध्यमांवर व्हायरल होत आहे. प्रवाशाच्या अशा अचानक किंचाळण्यामुळे बसमधील प्रवाशांसह हा व्हिडिओ पाहणाऱ्यांनाही हसू आवरता येत नाही. पिंपरी चिंचवडमधील ही घटना आहे.
यात प्रवासी एकदम छाती पिटत, धाय मोकलून ‘वाचवा रे’, अशी जोरजोरात आरोळी ठोकत आहे.रस्त्यावरील इतर प्रवाशांना पाहून बसमधील या प्रवाशाने मोठमोठ्यात आरोळ्या दिल्या. त्यामुळे रस्त्यावरील प्रवासीही थांबले व बसचालकाला दरवाजे अनलॉक करण्याची विनंती केली.
प्रवाशाला आपला बसथांबा चुकल्याचे एकदम लक्षात आल्याने त्याने तातडीने बसचालकाला बस थांबवण्याची विनंती केली. पण बसचालकाने पुढच्या थांब्यावर बस थांबेल तेथे उतरा, असे प्रवाशाला खडसावून सांगितले. पण, तो युवक प्रवासी काही ऐकायला तयार नव्हता. “आत्ताच बस थांबवा” असे म्हणत त्याने बसचालकाला शिवीगाळ केली व पुढे येत बसमधून उतरण्याचा प्रयत्न केला.
बसचालकाने तातडीने दरवाजे लॉक केले. त्यामुळे प्रवाशाला उतरता येत नव्हते. म्हणून प्रवाशाने बसमध्ये इतर प्रवाशांसमोरच जोरजोरात बोंबा मारायला सुरूवात केली. ‘वाचवा रे, बसचालक त्रास देतोय, उतरू देत नाही, वाचवा रे’, अगदी छाती पिटून प्रवाशाने अशा आरोळ्या ठोकल्या.
