कोल्हापूर : कोल्हापूर जिल्हा दूध उत्पादक सहकारी संघ अर्थात गोकुळच्या अध्यक्षपदी नविद मुश्रीफ यांची निवड करण्यात आली आहे. अध्यक्षपदाच्या निवडीसाठी संचालक मंडळाची सभा गोकुळ शिरगाव येथील मुख्य कार्यालयात झाली. या निवडीमुळे आता काँग्रेस जिल्हा अध्यक्ष व आमदार सतेज पाटील यांना मोठा धक्का बसला आहे.
गेल्या काही दिवसांपासून या अध्यक्षपदाच्या निवडणुकीची जोरदार चर्चा होती.विशेष म्हणजे ‘गोकुळ’चा अध्यक्ष महायुतीचा व्हावा यासाठी थेट मुख्यमंत्री देवेंद्र फडणवीस यांनी हस्तक्षेप केल्याची चर्चा आहे. महायुतीचाच अध्यक्ष होण्यासाठी राज्यातील नेत्यांचा दबावही होता. राष्ट्रवादीचे नेते हसन मुश्रीफ यांचे सुपुत्र असलेल्या नावेद मुश्रीफ यांची निवड झाल्यानंतर कार्यकर्त्यांनी कार्यालयामध्ये मोठा जल्लोष केला. तसेच गुलालाची गोकुळ कार्यालयाबाहेर उधळण करत घोषणाबाजी केली.
महायुतीने आमदार सतेज पाटील यांना धक्का देत डावच उलटवला. अध्यक्ष पदासाठी चर्चेत असलेले शशिकांत पाटील -चुयेकर यांचे नाव शेवटच्या क्षणी महायुतीच्या नेत्यांच्या दबावाने मागे पडले. अखेर नवीद मुश्रीफ यांच्या गळ्यात अध्यक्षपदाची माळ पडली.
