पुणे : एसआयआर घोटाळा व इतर विविध मुद्द्यांवरून दिल्लीतील जंतरमंतर येथे विरोधी पक्षांकडून आंदोलने सुरू आहेत. याच पार्श्वभूमीवर ‘इंडिया’ आघाडीच्या वतीने आयोजित एका मोर्च्यात शिवसेना (उबाठा) खासदार संजय राऊत यांनी सरन्यायाधीशांबद्दल आणि न्यायव्यवस्थेबद्दल थेट भाष्य केले होते. या वक्तव्याची सर्वोच्च न्यायालयाने गंभीर दखल घेत त्यांना नोटीस बजावली. तसेच, या प्रकरणी न्यायालयाचा अवमान झाल्याप्रकरणी कायदेशीर कारवाई करण्यासाठी अ‍ॅटर्नी जनरल यांनी संमती दिल्याची माहिती समोर आली आहे. त्यामुळे राऊत यांच्यासमोरील अडचणी अधिक वाढल्या आहेत.
निवडणूक आयोगाच्या संदर्भात दाखल एका याचिकेच्या सुनावणीदरम्यान सरन्यायाधीश सूर्य कांत यांनी राजकीय नेत्यांच्या वक्तव्यांवर तीव्र नाराजी व्यक्त केली. विरोधकांनी न्यायाधीशांचे सत्ताधारी भाजप नेत्यांशी जवळचे संबंध असल्याचा आरोप करत, ‘न्यायाधीश राजकीय कार्यक्रमांना जातात आणि बॅडमिंटन खेळतात,’ अशी विधाने केली होती. यावर न्यायालयाने संबंधित याचिकाकर्त्याला आपल्या वर्तनाबाबत स्पष्टीकरण देण्याचे निर्देश दिले आहेत.
वाद वाढल्यानंतर खासदार संजय राऊत यांनी पत्रकार परिषद घेऊन न्यायालयाची बिनशर्त माफी मागितली. “आम्ही सर्वोच्च न्यायालयाचा पूर्ण आदर करतो. राष्ट्रपतींनंतर सर्वोच्च न्यायालय हीच देशातील सर्वात मोठी आणि महत्त्वाची घटनात्मक संस्था आहे. सामान्य माणसासाठी ती न्यायाची शेवटची आशा आहे. त्यामुळे माफी मागण्यात मला कोणताही संकोच नाही,” असे राऊत यांनी स्पष्ट केले.
आपली भूमिका मांडताना राऊत पुढे म्हणाले की, “आम्ही केवळ न्यायाची मागणी करत आहोत. शिवसेना पक्ष, चिन्ह तसेच अंकिता भंडारी प्रकरणात गेली चार वर्षे लढा देऊनही अद्याप अपेक्षित न्याय मिळालेला नाही.” आता संजय राऊत यांनी माफी मागितल्यामुळे आणि न्यायालयाने कारणे दाखवा नोटीस बजावल्यामुळे या संपूर्ण कायदेशीर प्रकरणाला नेमके कोणते वळण मिळते, याकडे सर्वांचे लक्ष लागले आहे.
