पुणे : वरिष्ठ लष्करी अधिकाऱ्याच्या बंगल्यातून चंदनाची तीन झाडे चोरून नेल्याची घटना उघडकीस आली आहे. याप्रकरणी चंदन चोरट्यांविरुद्ध गुन्हा दाखल करण्यात आला असून पसार झालेल्या चोरट्यांचा पोलिसांकडून शोध घेण्यात येत आहे. याबाबत पांडीयराज मुरुगन (वय ३०) यांनी बंडगार्डन पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, लष्कर भागातील पूना क्लबजवळ डॉ. राजेंद्रसिंग मार्गावर वरिष्ठ लष्करी अधिकाऱ्यांचे बंगले आहेत. हे बंगले प्रशस्त आहेत. नाताळानिमित्त लष्करी अधिकारी बाहेरगावी गेले आहेत. दोन दिवसांपूर्वी मध्यरात्री चोरटे बंगल्याच्या आवारात शिरले. चोरट्यांनी चंदनाची तीन झाडे कापून नेली.
चंदनाची झाडे चोरीला गेल्याचा प्रकार लक्षात आल्यानंतर पोलिसांकडे तक्रार देण्यात आली, अशी माहिती सहायक पोलिस निरीक्षक डॉ. आरिफा मुजावर यांनी दिली आहे. पोलिसांनी लष्करी अधिकाऱ्यांच्या बंगल्यास भेट दिली. बंगल्याचे आवार प्रशस्त आहेत. बंगल्यात सीसीटीव्ही कॅमेरे नाहीत. त्यामुळे चोरट्यांचे चित्रीकरण उपलब्ध झाले नाही. पसार झालेल्या चोरट्यांचा पोलिसांकडून माग काढण्यात येत आहे. सहायक पोलिस निरीक्षक मुजावर तपास करत आहेत.
