छत्रपती संभाजीनगर : राज्यात दिवसेंदिवस गुन्हेगारीच्या घटना घडत आहेत. त्यातच छत्रपती संभाजीनगरमधील वाळूज परिसरात अशीच एक धक्कादायक घटना घडली आहे. वाळूज MIDC परिसर गोळीबाराने हादरला आहे. वाळूजच्या वडगाव कोल्हाटी भागात एका व्यक्तीची गोळ्या झाडून हत्या करण्यात आली आहे.
याघटनेबाबत सविस्तर माहिती अशी की, कपिल पिंपळे असे हत्या झालेल्या तरुणाचे नाव आहे. हत्येचे कारण अद्याप अस्पष्ट असून पोलीस घटनास्थळी धाव घेत मृतदेह ताब्यात घेतला आहे.
तरुणाच्या छातीत गोळ्या घालून आरोपी बंदूक तिथेच टाकून घटनास्थळावरुन पसार झाला आहे. पोलीसांनी पुढील तपासणीसाठी मृतदेह घाटी रुग्णालयात हलवला आहे. भरवस्तीत निर्घृण हत्या करण्यात आल्याने परिसरात एकच खळबळ उडाली आहे. पोलीस या प्रकरणाचा अधिक तपास करीत आहेत.
