लोणी काळभोर : लोणी रेल्वे स्टेशन परिसरात रेल्वे रुळालगत झाडाखाली सुरू असलेल्या रम्मी जुगाराच्या अड्ड्यावर लोणी काळभोर पोलिसांनी 25 जुलै दुपारी तीन वाजण्याच्या सुमारास छापा टाकला आहे. या छाप्यात 4 जणांना रंगेहात पकडण्यात आले आहे. या कारवाईत 1 हजार 900 रुपयांची रोख रक्कम आणि पत्त्यांचे जुगार साहित्य जप्त करण्यात आले असून, सर्व आरोपींविरुद्ध महाराष्ट्र जुगार प्रतिबंधक अधिनियमाच्या कलम 12 (अ) अन्वये गुन्हा दाखल करण्यात आला आहे.
राजकुमार यश शिंगोडे (रा. कदमवाकवस्ती), गणेश किसन शेळके (रा. माळीमळा, लोणी काळभोर), विनोद संदिपपान जाधव (रा. केडगाव रेल्वे स्टेशन) आणि जाकीर रसन शेख (रा. लोणी कॉलनी, रेल्वे स्टेशन परिसर) असे रंगेहात पकडण्यात आलेल्यांची नावे आहेत. याप्रकरणी पोलीस अंमलदार सचिन भिमराव सोनवणे यांनी सरकारतर्फे लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, पोलीस उपनिरीक्षक योगेश पैठणे यांच्या नेतृत्वाखाली तपास पथकाने लोणी काळभोर रेल्वे स्टेशन परिसरात अवैध जुगाराविरोधात विशेष मोहीम राबविली. गोपनीय माहितीच्या आधारे पोलिसांनी दोन पंचांना सोबत घेत घटनास्थळी सापळा रचला.रेल्वे स्टेशनलगत रुळाशेजारी असलेल्या झाडाखाली काही जण पत्त्यांवर पैशांचा डाव खेळत असल्याची खात्री झाल्यानंतर दुपारी सुमारे 3 वाजता अचानक छापा टाकण्यात आला.
पोलिसांची चाहूल लागताच आरोपींनी पत्ते आणि पैसे टाकून पळून जाण्याचा प्रयत्न केला. मात्र, पोलिसांनी तत्परता दाखवत राजकुमार शिंगोडे , गणेश शेळके, विनोद जाधव आणि जाकीर शेख यांना ताब्यात घेतले. आरोपींची झडती घेतली असता त्यांच्या ताब्यातून 1 हजार 900 ची रोख रक्कम, पत्त्यांचे कॅट आणि जुगारासाठी वापरण्यात येणारे साहित्य जप्त करण्यात आले. पंचांसमक्ष मुद्देमाल सीलबंद करून पोलिसांनी जप्त केला.
या प्रकरणी पोलीस अंमलदार सचिन सोनवणे यांनी सरकारतर्फे फिर्याद दिली असून, चारही आरोपींविरुद्ध महाराष्ट्र जुगार प्रतिबंधक अधिनियम कलम 12 (अ) अंतर्गत गुन्हा दाखल करण्यात आला आहे. पुढील तपास लोणी काळभोर पोलीस करीत आहेत. विशेष म्हणजे, अवैध धंद्यांविरोधातील कारवाईचा भाग म्हणून लोणी काळभोर पोलिसांनी अलीकडच्या काही दिवसांत जुगार अड्ड्यांवर सलग धाडी टाकत कारवाईचा धडाका सुरू ठेवला आहे.
