मुंबई : मुंबईचे प्रमुख ‘फुफ्फुस’ म्हणून ओळखल्या जाणाऱ्या बोरिवली येथील संजय गांधी राष्ट्रीय उद्यानाच्या अत्यंत संवेदनशील संरक्षित क्षेत्रात एका धार्मिक कार्यक्रमाचे आयोजन करण्यात आल्याचा धक्कादायक प्रकार समोर आला आहे. 28 ऑगस्ट रोजी उद्यानातील शासकीय कार्यालयाजवळील नदीपात्रात हा सोहळा पार पडल्याचे सांगण्यात येत असून, या प्रकारामुळे वनविभागाच्या कारभारावर तीव्र संताप व्यक्त केला जात आहे.
संजय गांधी राष्ट्रीय उद्यान अनेक दुर्मिळ वन्यजीवांचे अधिवासस्थान आहे. निसर्गाचे संरक्षण व्हावे आणि वन्यप्राण्यांना मानवी त्रासापासून वाचवता यावे, यासाठी सामान्य नागरिक किंवा पर्यटकांना येथील नदीपात्रात उतरण्यास प्रशासनाकडून सक्त बंदी घातली जाते. असे असताना, मग या विशिष्ट धार्मिक कार्यक्रमाला कोणत्या नियमांच्या आधारे आणि कोणाच्या सहमतीने परवानगी दिली गेली? असा थेट सवाल आता स्थानिक नागरिक आणि पर्यावरणप्रेमी विचारत आहेत.
संरक्षित वनक्षेत्रात अशा प्रकारे नियमांची पायमल्ली होण्याची ही पहिलीच वेळ नाही. याआधीही उद्यानाच्या हद्दीत कावड यात्रा आयोजित करण्यात आली होती, ज्याचा व्हिडिओ सोशल मीडियावर प्रचंड व्हायरल झाला होता. वारंवार घडणाऱ्या या घटनांमुळे वन्यजीव संरक्षण कायद्याची अंमलबजावणी करण्याबाबत प्रशासनाच्या हेतूवर शंका उपस्थित केली जात आहे. “जर कायदे सर्वांसाठी एकच आहेत, तर अशा कार्यक्रमांना सवलत का दिली जाते?” असा सवाल आता उपस्थित होत आहे.
पर्यावरणाच्या दृष्टीने अत्यंत महत्त्वाच्या असलेल्या या जंगलाच्या सुरक्षेशी खेळणाऱ्या या घटनेबाबत उद्यान प्रशासनाने त्वरित आपली भूमिका स्पष्ट करावी, अशी मागणी केली जात आहे. त्याचप्रमाणे राज्य सरकारने या प्रकरणाची दखल घेऊन चौकशी करावी आणि दोषी अधिकारी तसेच संबंधितांवर कठोर कारवाई करून त्याची माहिती जाहीर करावी, असा सूर आता उमटत आहे.
