पुणे : कुकडी कालव्याचे रब्बी हंगामातील आवर्तन १ जानेवारी तर घोस डावा व उजव्या कालव्याचे पहिले आवर्तन १० जानेवारी रोजी सोडण्यात येणार असल्याचे कुकडी प्रकल्प व घोड प्रकल्प कालवा सल्लागार समितीच्या बैठकीनंतर जाहीर करण्यात आले. विधानभवन येथे झालेल्या बैठकीचे आयोजन पालकमंत्री चंद्रकांतदादा पाटील यांच्या अध्यक्षतेखाली करण्यात आले होते.
या बैठकीला पालकमंत्री चंद्रकांतदादा पाटील, महसूलमंत्री राधाकृष्ण विखे पाटील, आमदार दिलीप वळसे पाटील, अशोक पवार, रोहित पवार, अतुल बेनके, विभागीय आयुक्त सौरभ राव, जिल्हाधिकारी डॉ. राजेश देशमुख, महाराष्ट्र कृष्णा खिरे विकास महामंडळाचे कार्यकारी संचालक अतुल कपोले, मुख्य अभियंता (विप्र) हेमंत धुमाळ, अधीक्षक अभियंता संतोषकुमार सांगळे आदी मान्यवर यावेळी उपस्थित होते.
डिंभे बोगद्याच्या कामासाठी सुमारे ५५० कोटी रुपयांची आवश्यकता असल्याचे यावेळी सांगण्यात आले. त्यानुसार या कामाचा प्रस्ताव तातडीने करण्याचे निर्देश मंत्री चंद्रकांतदादा पाटील व विखे पाटील यांच्या वतीने देण्यात आपले. धरणाच्या डाव्या कालव्यातून सोडण्यात आलेले पाणी अपेक्षित क्षमतेने शेताच्या क्षेत्राला मिळावे यासाठी पाणी गळती रोखण्यासाठी महामंडळाच्या अधिकाऱ्यांनी उपाय योजना करण्याचे आदेश यावेळी देण्यात आले असून नदीवरील तसेच कालव्यावतील अनियंत्रित व अनाधिकृत पाणी उपसा नियंत्रणात आणावा अशा सूचना देखील करण्यात आल्या आहेत.
या प्रकल्पातून पुणे, अहमदनगर व सोलापूर जिल्ह्यातील शेती, पिण्यासाठी तसेच उद्योगांना पाणीवाटप केले जाते. सर्वाना समान पद्धतीने पाणी मिळेल, याकडे लक्ष्य देण्याच्या सूचना देखील यावेळी मंत्र्यांकडून देण्यात आल्या आहेत. तसेच डिंभे डाव्या कालव्याच्या दुरुस्तीसाठी बिगरसंचानामधून ३० कोटी रुपयांची कामे करण्यात आली आहे. तसेच यावरती अजून ३० कोटी रुपयांची कामे करण्याचे नियोजन असल्याचे मुख्य अभियंता हेमंत धुमाळ यांनी बोलताना सांगितले आहे.
