पुणे : वादळी वाऱ्यासह सोमवारी मुसळधार पावसाने पुन्हा शहर परिसराला झोडपले.सोमवारी झालेल्या पावसाने पुन्हा एकदा पुण्याची वाताहत केली. पाण्याचा निचरा न झाल्याने रस्त्यांवर पुर आला. मोठ्या प्रमाणात पाणी सचल्याने नागरिकांची तारांबळ उडाली.
शहर परिसरात मुसळधार पाऊस झाला असता विविध ठिकाणी पाणी शिरल्याच्या व इतर घटना अग्निशमन दलाच्या नियंत्रण कक्षात नोंद झाल्या असून अग्निशमन दलाच्या जवानांनी पाण्यात अडकलेल्या एकुण १२ जणांची सुखरुप सुटका करुन आपले कर्तव्य चोख बजावले आहे.
कोंढवा खुर्द भाजी मंडई लगत एका ठिकाणी ०७ नागरिक पाण्यामधे अडकले होते. या सर्व ०७ सुखरुप बाहेर काढण्यासाठी रश्शीचा वापर करून पाण्यामधे जात कोंढवा खुर्द अग्निशमन जवान निलेश लोणकर, रवि बारटक्के, नारायण मिसाळ, सुरज माळवदकर, सागर इंगळे, अनिकेत गोगावले,तांडेल केदारी व चालक दिपक कचरे यांनी ही उत्तम कामगिरी केली.
अनेक भागात घरांमध्ये तसेच काही हॉटेलमध्ये पाणी शिरले होते. तर सखल भागातील घरात देखील पाणी शिरले होते. शहरात अनेक ठिकाणी शॉर्टसर्किट आणि झाडपडीच्या घटना घडल्या. अग्निशामक दलाच्या तत्परतेमुळे काही नागरिकांचे प्राण वाचवण्यात आले.
रस्त्यांना ओढ्याचे स्वरूप प्राप्त झाले होते.रस्त्यावर लावलेल्या काही दुचाक्या या पाण्यात वाहून गेल्या. या पावसामुळे अनेक घरात पाणी शिरले होते. रेल्वे स्थानक आणि जवळील भुयारी मार्गात तब्बल ४ फुट पाणी साचले होते. मंगळवार पेठ, स्वरुपवर्धिनी जवळ मोठ्या प्रमाणात पाणी साचल्याने एक कुटूंब पाण्यात अडकले होते. या कुटुंबाची सुटका अग्निशामक दलाच्या कर्मचाऱ्यांनी केली.
मंगळवार पेठ, स्वरुपवर्धिनी जवळ मोठ्या प्रमाणात पाणी साचल्याने एक कुटूंब पाण्यात अडकले होते. तेथील स्थानिक पल्लवी जावळे यांनी मुख्य अग्निशमन अधिकारी देवेंद्र पोटफोडे यांना कळविताच तिथे अग्निशमन अधिकारी प्रदीप खेडेकर, तांडेल राजाराम केदारी, अनिल करडे व जवान छगन मोरे, शफीक सय्यद, हरिश बुंदेले, राजू जगदाळे, निलेश कर्णे, महेश गरड, मयुर कारले, चंद्रकांत मेनसे, राहुल जाधव, नवनाथ जावळे व चालक धीरज सोनावणे यांनी तेथील ०३ लहान मुली ०१ महिला व ०१ पुरूष (एकुण ०५) यांना सुखरुप बाहेर आणले. यामधे तांडेल राजाराम केदारी यांनी लहान मुलींना खांद्यावर घेऊन येताच स्थानिकांनी त्यांचे आभार मानले व याचा व्हिडीओ सोशल मिडियावर बराच प्रसिद्ध झाला.
सीमा भिंतीचा भाग पडल्याची घटना पर्वती, रमणा गणपतीजवळ घडली. तसेच झाडपडी ०३ ठिकाणी ज्यामधे हडपसर, आकाशवाणी जवळ रस्त्यावर तर चंदननगर, बिडी कामगार वसाहत येथे रिक्षावर झाड पडले आणि पाषाण, लोयला स्कुल येथे दुचाकीवर झाड पडले होते. यामधे दलाची मदत पोहोचण्यापुर्वी जखमी झालेल्या दुचाकीस्वाराला नागरिकांनी दवाखान्यात दाखल केले.
