पुणे : दोन अल्पवयीन बहि‍णींवर अत्याचार करून त्यांची हत्या केल्या प्रकरणी पुणे ग्रामीण पोलिसांकडून गुरुवारी एका ५४ वर्षीय व्यक्तीला अटक करण्यात आली आहे. पुणे जिल्ह्यातील राजगुरूनगर शहरात हा धक्कादायक प्रकार उघडकीस आला आहे. दरम्यान या घटनेत ८ आणि ९ वर्षीय दोन बहि‍णींची लैंगिक अत्याचारानंतर हत्या करण्यात आल्यावरून संतापाची एकच लाट उसळली आहे.
पोलिसांनी दिलेल्या माहितीनुसार, आरोपी हा एका स्थानिक हॉटेलमध्ये स्वयंपाकी म्हणून काम करतो आणि पीडित मुलींच्या शेजारी राहतो, तसेत त्याची मुलींच्या कुटुंबियांसोबत ओळख असल्याची माहिती प्राथमिक तपासात समोर आली आहे. या दोन मुलींचे मृतदेह बुधवारी रात्री त्यांच्या घराजवळील एका खोलीत पाणी साठवण्यासाठी वापरण्यात येणार्‍या ड्रममध्ये आढळून आले होते, असेही पोलिसांनी सांगितले आहे. या घटनेने जिल्ह्यात एकच खळबळ उडाली.
नेमकं काय घडलं होतं?
राजगुरूनगर येथे बुधवारी दुपारी दोन चिमुकल्या बहिणी घराजवळ खेळत होत्या. त्यावेळी अचानक खेळता खेळता त्या दोघेही गायब झाल्या. दरम्यान, पालकांनी दोन्ही चिमुकलींना शोधण्यासाठी संपूर्ण परिसर पिंजून काढला होता. पण त्यांचा काही शोध लागला नाही. सकाळी घराजवळ खेळत असलेल्या मुली सापडत नसल्याची तक्रार त्यांच्या कुटुंबियांनी पोलीस स्टेशनमध्ये दिली.
यानंतर पोलिसांनी या प्रकरणी गुन्हा दाखल केला आणि मुलींचा शोध घेण्यास सुरूवात केली. रात्री उशिरापर्यंत शोधाशोध केल्यानंतर त्या दोघींचे मृतदेह राजगुरुनगर शहरातील एका इमारतीच्या ड्रममध्ये दयनीय अवस्थेत सापडले. पोलिसांनी घटनास्थळी धाव घेत मुलींचे मृतदेह शवविच्छेदनासाठी चांडोली ग्रामीण रुग्णालयात पाठवले. पोलिसांनी सांगितले की, पीडित मुलीचे वडील सफाई कर्मचारी म्हणून काम करतात तर आई मजूर आहे.
पोलिसांनी दिलेल्या माहितीनुसार, आरोपीने कथितरित्या आधी वयाने लहान मुलीवर लैंगिक अत्याचार केला आणि नंतर तिचा आरडाओरडा ऐकून मदतीसाठी धावून आलेली मोठी बहीण देखील त्याच्या तावडीत सापडली. आरोपीने दोन्ही पीडित मुलींची हत्या केली आणि त्यांचे मृतदेह पाण्याच्या ड्रममध्ये फेकले, असेही पोलिसांनी सांगितले.
आरोपी ताब्यात..
पोलिसांनी आरोपीविरोधा पुणे जिल्ह्यातील एका पोलीस ठाण्यात भारतीय न्याय संहिता (बीएनएस) आणि बाललैंगिक गुन्हे प्रतिबंध (पोक्सो) कायद्यान्वये गुन्हा दाखल केला आहे. आरोपी हा उत्तर भारतात कुठेतरी पळून जाण्याच्या तयारीत असताना त्याला एका लॉजमधून अटक करण्यात आली अशी माहितीही पोलिसांनी दिली आहे.
“अल्पवयीन मुलींवर बलात्कार आणि हत्या केल्याच्या गुन्ह्याखाली आरोपीला अटक करण्यात आली आहे. गुन्ह्याचे कारण शोधण्यासाठी पुढील तपास सुरू आहे”, असे एका वरिष्ठ पोलीस अधिकाऱ्याने सांगितले.
