Pune Satara Highway: पुणे : पुणे-सातारा महामार्गावरील (Pune-Satara Highway) खंबाटकी घाटातील धोकादायक ‘एस’ आकाराच्या तीव्र वळणाच्या रस्त्याला पर्याय म्हणून नवे दोन बोगदे तयार करण्यात आले आहेत. प्रत्येकी तीन पदरी असलेले हे दोन बोगदे असून त्यांचे काम सुमारे 6 वर्षांपासून सुरू आहे. सध्या हे काम सुमारे 90 टक्के पूर्ण झाले आहे. त्यापैकी साताऱ्याकडून पुण्याकडे येणारा एक बोगदा शनिवारपासून वाहतुकीसाठी खुला करण्यात आला आहे. बोगद्याच्या उताराजवळील दरी पुलाचे काम अद्याप पूर्ण न झाल्याने सध्या प्रायोगिक तत्त्वावर केवळ हलक्या वाहनांसाठी वाहतूक सुरू करण्यात आली आहे. या बोगद्यामुळे प्रवासाचा वेळ सुमारे 20 ते 25 मिनिटांनी कमी होणार आहे.
खंबाटकी घाटातील सध्याचा रस्ता हा तीव्र उताराचा आणि ‘एस’ आकाराच्या वळणांचा असल्याने येथे अपघातांचे प्रमाण अधिक होते. घाट रस्त्यावर काही ठिकाणी दुहेरी लेन असल्याने वाहतुकीचा वेग कमी होतो. वीकएंड आणि सुट्ट्यांच्या काळात येथे मोठ्या प्रमाणात वाहतूक कोंडी होते. ही समस्या दूर करण्यासाठी भारतीय राष्ट्रीय महामार्ग प्राधिकरणाने दोन नव्या बोगद्यांच्या निर्मितीला फेब्रुवारी 2019 मध्ये मान्यता दिली. करोनाच्या काळात कामाची गती मंदावली होती, त्यामुळे प्रकल्पास मुदतवाढ देण्यात आली असून मार्च 2026 पर्यंत काम पूर्ण करण्याचे नियोजन आहे.
हा नवा रस्ता सुमारे 6.46 किलोमीटर लांबीचा आहे. डाव्या बाजूला 1307 मीटर आणि उजव्या बाजूला 1224 मीटर लांबीचा तीन पदरी बोगदा तयार करण्यात आला आहे. तसेच डाव्या बाजूला 1104 मीटर आणि उजव्या बाजूला 930 मीटर लांबीचा व्हायाडक्ट उभारण्यात येत आहे. पुण्याच्या बाजूला बोगदा संपल्यानंतर कॅनॉलपर्यंत दरी पूल बांधण्यात येत असून त्याचे सुमारे 15 टक्के काम बाकी आहे.
या बोगद्यांमुळे पूर्वी 45 मिनिटे लागणारा खंबाटकी घाटाचा प्रवास आता 10 ते 15 मिनिटांत पूर्ण होणार आहे. इंधनाची बचत होणार असून प्रवास अधिक सुरक्षित होईल. शनिवारी झालेल्या चाचणीवेळी साताऱ्याचे जिल्हाधिकारी संतोष पाटील यांच्यासह अनेक अधिकारी उपस्थित होते. सर्व काम पूर्ण झाल्यानंतर जुना घाट रस्ता बंद केला जाण्याची शक्यता असून धोकादायक ‘एस’ आकाराचे वळण इतिहासजमा होणार आहे, असे एनएचएआयच्या अधिकाऱ्यांनी सांगितले.
