पुणे : आगामी गणेशोस्तव, दहीहंडी आणि नवरात्रोसत्वाच्या तोंडावर पुण्यात ध्वनीप्रदूषणाचा मुद्दा पुन्हा ऐरणीवर आला आहे. आज पुण्यातील प्रसिद्ध डेक्कन परिसरातील गुडलक चौकात (30 ऑगस्ट 2026) सकाळी मोठ्या संख्येने नागरिक एकत्र आले होते. गणेशोत्सवा दरम्यान वाजवले जाणारे अवाजवी डीजे आणि भिंतींसारखे लाऊडस्पीकर यांच्यामुळे होणाऱ्या ध्वनि प्रदूषणाविरोधात सर्वजण एकवटत डीजे बंद करा, पुण्याची संस्कृती जपा अशी मागणी केली.
स्थानिक नागरिकांनी स्पष्ट केले की, त्यांचा पारंपरिक सणाला अथवा संस्कृतीला अजिबात विरोध नाही. मात्र, उत्सवाच्या नावाखाली मर्यादा ओलांडून होणारा कानठळ्या बसवणारा आवाज आता सहनशीलतेच्या पलीकडे गेला आहे. “आवाज नव्हे, आरती ऐकू द्या” आणि “डीजे बंद करा, पुण्याची संस्कृती जपा” अशा तीव्र भावना व्यक्त करणाऱ्या घोषणांनी संपूर्ण परिसर दुमदुमून गेला होता.
आंदोलनात सहभागी झालेल्या पुणेकरांनी प्रशासनासमोर काही महत्त्वाच्या मागण्या मांडल्या. यामध्ये पोलिस आणि स्थानिक प्रशासनाने ध्वनिमर्यादेच्या नियमांची अत्यंत कडक अंमलबजावणी करावी.नियमांचे उल्लंघन करणाऱ्या मंडळांवर तसेच डीजे चालकांवर तत्काळ गुन्हे नोंदवून त्यांचे साहित्य जप्त करण्यात यावे असे स्पष्ट सांगितले.
तसेच अतिउंच आवाजाचा लहान मुले, ज्येष्ठ नागरिक, आजारी व्यक्ती आणि अभ्यास करणाऱ्या विद्यार्थ्यांवर गंभीर परिणाम होतो. त्यामुळे या घटकांच्या आरोग्याचा विचार करून यंदाचा गणेशोत्सव ‘डीजेमुक्त’ वातावरणात साजरा व्हावा अशी मागणी त्यांनी केली.
गेल्या काही वर्षांत उत्सवातील ध्वनिक्षेपकांचा आवाज आरोग्यासाठी घातक ठरत असल्याने, पारंपरिक वाद्यांच्या गजरात आणि शांततेत उत्सव साजरा करावा, असा सूर या आंदोलनातून उमटला.
