तळेगाव दाभाडे : प्रधानमंत्री सूक्ष्म (Pune News) अन्न प्रक्रिया उपक्रम योजनेचे औपचारिकीकरण ही अन्न प्रक्रिया उद्योगातील असंघटित सूक्ष्म उद्योगांना बळ देण्यासाठी, त्यांचे आधुनिकीकरण करण्यासाठी आणि त्यांना औपचारिक स्वरूप देण्यासाठी भारत सरकारने सुरू केलेली एक केंद्रीय प्रायोजित योजना आहे. जी विद्यमान उद्योगांना तांत्रिक आणि आर्थिक सहाय्य पुरवते, ज्यामुळे त्यांची स्पर्धात्मकता वाढते, रोजगार निर्मिती होते आणि शेतकऱ्यांचे उत्पन्न सुधारते. या योजनेत कर्ज-संलग्न भांडवली अनुदानाद्वारे उद्योजकांना आर्थिक मदत मिळते, ज्यामुळे ते नवीन मशिनरी खरेदी करू शकतात आणि त्यांचे उत्पादन वाढवू शकतात. असे प्रतिपादन मावळचे तालुका कृषि अधिकारी मारुती साळे यांनी केले आहे.
तळेगाव दाभाडे (ता. मावळ) येथील राष्ट्रीय सुगी पश्चात तंत्रज्ञान व्यवस्थापन संस्थेत शेतकऱ्यांसाठी एक दिवसीय कार्यशाळेचे नुकतेच आयोजन करण्यात आले होते. त्यावेळी शेतकऱ्यांना मार्गदर्शन करताना वरील प्रतिपादन तालुका कृषि अधिकारी मारुती साळे यांनी केले आहे. यावेळी मावळ पंचायत समितीचे कृषि अधिकारी संताजी जाधव. पीएमएफएमईचे जिल्हा संसाधन हेमंत कापसे व तालुक्यातील सर्व मंडळ कृषी अधिकारी, उपकृषी अधिकारी, सहाय्यक कृषी अधिकारी व शेतकरी मोठ्या संख्येने उपस्थित होते.
दरम्यान, हेमंत कापसे यांनी मार्गदर्शन करताना प्रधानमंत्री सूक्ष्म अन्न प्रक्रिया उपक्रम योजनेचे संपूर्ण निकष शेतकऱ्यांना सांगितले. या योजनेत कोणकोणते प्रकल्प पात्र आहेत. अनुदान,अर्ज प्रक्रिया,बँक कर्ज प्रक्रिया याबद्दल सविस्तर माहिती सांगितली. या कार्यक्रमाचे सूत्रसंचालन आत्माचे तालुका तंत्रज्ञान व्यवस्थापक राहुल घोगरे यांनी केले.
