पुणे: ‘पुणे तिथे काय उणे’ या म्हणीची प्रचिती देणारी एक अतिशय चित्र-विचित्र बातमी सध्या शहरात चर्चेचा विषय ठरली आहे. जपानसारख्या देशात प्रसिद्ध असलेली ‘रेंट-अ-रिलेशन’ (Rent-a-Relation) ही संकल्पना आता पुण्याच्या गल्लीबोळात पोहोचली आहे. सोशल मीडियावर व्हायरल झालेल्या एका पत्रकाने पुणेकरांच्या भुवया उंचावल्या असून, चक्क ‘भाड्याने बॉयफ्रेंड’ आणि ‘भाड्याने भाऊ’ देण्याची ऑफर या जाहिरातीतून देण्यात आली आहे.
पुण्यातील काही भागांत सध्या एक जाहिरात पत्रक वाटले जात आहे, ज्याचा फोटो ‘X’ (ट्विटर) वर प्रचंड व्हायरल झाला आहे. ही सेवा प्रामुख्याने तरुणी आणि महिलांसाठी असल्याचा दावा करण्यात आला आहे. जर तुम्हाला एकाकी वाटत असेल, मनातल्या गोष्टी सांगायला कोणी नसेल, किंवा चित्रपट पाहण्यासाठी व कॉफी पिण्यासाठी सोबती हवा असेल, तर ही संस्था तुम्हाला ठराविक शुल्कात ‘मित्र’ किंवा ‘भाऊ’ उपलब्ध करून देईल.
जपानमध्ये एकाकीपणा ही मोठी सामाजिक समस्या आहे. तिथे सण साजरे करण्यासाठी किंवा भावनिक आधार मिळवण्यासाठी आई-वडील, जोडीदार किंवा मित्र भाड्याने घेण्याची पद्धत जुनी आहे. “पुण्याचं आता जपान होणार” अशा मिश्किल टिप्पण्या सोशल मीडियावर उमटत आहेत.
