पुणे: मसाजच्या नावाखाली वेश्या व्यवसाय चालवणाऱ्या एका स्पावर (Pune Crime) अनैतिक मानवी वाहतूक व (Pune News) व्यापार प्रतिबंधक कक्षाच्या पोलिसांनी छापा टाकून मॅनेजर आणि मालकीण अशा दोन महिलांना ताब्यात घेतले आहे. या कारवाईत 5 पीडित महिलांची सुटका करण्यात आली आहे. स्पा मॅनेजर वय 38 आणि स्पा मालकीण वय 36 अशी गुन्हा दाखल करण्यात आलेल्या महिलांची माहिती आहे.
ही कारवाई खराडी परिसरातील संभाजीनगर येथे असलेल्या विश्वविमल कॉम्प्लेक्समधील ‘ए वन स्पा’ येथे 4 डिसेंबर रोजी सायंकाळी 5 वाजण्याच्या सुमारास करण्यात आली. या प्रकरणी पोलीस हवालदार वैशाली शिवाजी इंगले यांनी चंदननगर पोलीस ठाण्यात फिर्याद दाखल केली आहे.
पोलिसांनी दिलेल्या माहितीनुसार, अनैतिक मानवी वाहतूक व व्यापार प्रतिबंधक कक्षाच्या पोलीस निरीक्षक आशालता खापरे यांना या स्पामध्ये मसाजच्या आडून बेकायदेशीर वेश्या व्यवसाय सुरू असल्याची गोपनीय माहिती मिळाली होती. या माहितीनंतर पोलिसांनी नियोजन करून एक बनावट ग्राहक स्पामध्ये पाठवला. बनावट ग्राहकाने सांकेतिक भाषेत संदेश दिल्यानंतर पोलिस पथकाने तात्काळ स्पावर छापा टाकला.
छाप्यादरम्यान स्पामध्ये 5 महिलांना जबरदस्तीने या व्यवसायात राबवले जात असल्याचे आढळून आले. स्पा मॅनेजर आणि मालकीण ग्राहकांकडून पैसे घेऊन त्यातील निम्मी रक्कम स्वतःकडे ठेवत असल्याचे तपासात समोर आले आहे. पीडित महिलांची तत्काळ सुटका करून त्यांना सुरक्षित ठिकाणी हलवण्यात आले आहे.
या प्रकरणी दोन्ही महिलांविरोधात गुन्हा दाखल करण्यात आला असून पुढील तपास वरिष्ठ पोलीस निरीक्षक सीमा ढाकणे करत आहेत. पोलिसांकडून या स्पाशी संबंधित इतर व्यक्तींचा सहभाग आहे का, याचाही शोध सुरू आहे.
