पुणे: मुंबई आणि पुणेकरांसाठी (Pune-Mumbai Railway) एक महत्त्वाची बातमी समोर आली आहे. पुणे–मुंबई रेल्वे मार्गावर उद्या 7 डिसेंबर 2025 रोजी मेगाब्लॉक घेण्यात येणार असून याचा थेट परिणाम अनेक एक्स्प्रेस गाड्या आणि पुणे–लोणावळा लोकल सेवेवर होणार आहे. या मेगाब्लॉकमुळे अनेक गाड्या रद्द करण्यात आल्याने प्रवाशांचे हाल होण्याची शक्यता आहे. (Pune News)
रेल्वे प्रशासनाकडून मिळालेल्या माहितीनुसार, पुणे विभागात लोणावळा ते कल्याण दरम्यान आर अँड डी अप आणि डाऊन लाईन्सचे विस्तार काम तसेच अप यार्डमध्ये अतिरिक्त लाईन टाकण्याचे काम हाती घेण्यात आले आहे. या कामासाठी 6 आणि 7 डिसेंबर रोजी विशेष ट्रॅफिक आणि पॉवर ब्लॉक जाहीर करण्यात आला आहे. त्यानुसार, 7 डिसेंबर रोजी दुपारी 2.15 ते सायंकाळी 6.15 या वेळेत मेगाब्लॉक राहणार आहे.
या काळात पुणे–मुंबई रेल्वे मार्गावरील गाड्यांच्या मार्गक्रमणावर मोठ्या प्रमाणावर परिणाम होणार आहे. सिंहगड एक्सप्रेस, डेक्कन क्वीन, प्रगती एक्सप्रेस, इंद्रायणी एक्सप्रेस यांसह पुणे–मुंबई दरम्यान धावणाऱ्या एकूण 17 एक्स्प्रेस गाड्या रद्द ठेवण्यात येणार असल्याची माहिती रेल्वे विभागाने दिली आहे. त्याचबरोबर पुणे–लोणावळा उपनगरीय लोकल सेवेलाही या मेगाब्लॉकचा फटका बसणार आहे.
महापरिनिर्वाण दिनाच्या पार्श्वभूमीवर मोठ्या संख्येने प्रवासी प्रवास करत असल्याने या मेगाब्लॉकमुळे अडचणी वाढण्याची शक्यता वर्तवली जात आहे. त्यामुळे प्रवाशांनी प्रवासाची योजना करताना खबरदारी घ्यावी, असे आवाहन रेल्वे प्रशासनाकडून करण्यात आले आहे. प्रवाशांनी प्रवासापूर्वी आपल्या गाडीचे वेळापत्रक तपासावे आणि गरज असल्यास IRCTC पोर्टल किंवा रेल्वे स्थानकावरील तिकिट काउंटरवर तिकिट रद्द किंवा बदल करून घ्यावे, असा सल्ला देण्यात आला आहे. मेगाब्लॉकच्या काळात पर्यायी प्रवास व्यवस्थेचा विचार करण्याचेही आवाहन करण्यात आले आहे.
