Pune Crime, उरुळी कांचन : दारू पिण्यास पैसे न दिल्याने शिवीगाळ, दमदाटी करून एकाच्या डोक्यात बिअरची बाटली फोडल्याची घटना घडली आहे. ही घटना उरुळी कांचन (ता. हवेली) ग्रामपंचायत हद्दीतील तळवाडी चौकात मंगळवारी (ता. 02) रात्री दहा वाजण्याच्या सुमारास घटना घडली आहे. या मारहाणीत एकजण गंभीर जखमी झाला आहे तर उरुळी कांचन पोलीस ठाण्यात एकावर विविध गंभीर काळामन्वये गुन्हा दाखल करण्यात आला आहे. (pune crime)
परेश विठ्ठल कांचन (वय-28, रा. आश्रम रोड, गणेश मंदिरासमोर, उरुळी कांचन, ता. हवेली) असे हल्ला झालेल्या तरुणाचे नाव आहे.तर संतोष उर्फ बुनक्या शिंदे ( वय व पुर्ण नाव माहीती नाही, रा. श्रीराम पतसंस्थेजवळ, तळवाडी चौक, उरुळी कांचन, ता. हवेली) असे आरोपीचे नाव आहे.
पोलिसांनी दिलेल्या माहितीनुसार, फिर्यादी परेश कांचन हे पुणे सोलापूर राष्ट्रीय महामार्गाच्या सेवा रस्त्यावरून मंगळवारी (ता. 02) रात्री दहा वाजण्याच्या सुमारास चालले होते. परेश कांचन यांना तळवाडी चौकाजवळ असलेल्या हॉटेल शैलेजा येथे संतोष शिंदे उर्फ बुनक्या हा भेटला. बुनक्या याने कांचन यांच्याकडे दारू पिण्यासाठी पैसे मागितले. त्यावेळी कांचन याने माझ्याकडे पैसे नाहीत. मी तुला दारू पिण्यासाठी पैसे देणार नाही असे स्पष्ट सांगितले.
दरम्यान, दारू पिण्यास पैसे न दिल्याने बुनक्या व कांचन यांच्यामध्ये बाचाबाची झाली. याचा राग मनात धरून संतोष शिंदे याने कांचन यांना शिवीगाळ दमदाटी केली. व रागाच्या भरात बुनक्या याने हातातील बिअरची बाटली कांचन यांच्या डोक्यात मारली. त्यानंतर कांचन यांना खाली पाडुन हाताने व लाथाबुक्क्यांनी मारहाण केली. तसेच बुनक्याने कांचन यांच्या डोक्यात व छातीवर चावा घेतला.
या मारहाणीत कांचन हे जखमी झाले होते. त्याच्या डोक्यातून रक्तस्त्राव येत होता. कांचन यांनी उपचार घेतल्यानंतर आरोपी संतोष शिंदे उर्फ बुनक्या याच्यावर उरुळी कांचन पोलीस ठाण्यात फिर्याद दिली आहे. त्यानुसार संतोष शिंदे उर्फ बुनक्या याच्यावर पोलीस ठाण्यात भारतीय न्याय संहिता कलम 118 (1), 115 (2), 351(2), 352 प्रमाणे गुन्हा दाखल करण्यात आला आहे. पुढील तपास पोलीस हवालदार गायकवाड करत आहेत.
