पुणे : भोसरी एमआयडीसीमधील उद्योगांसह भोसरी गाव, नाशिक रोड, दिघी या परिसरातील सर्व वर्गवारीतील ग्राहकांना सुरळीत व दर्जेदार वीजपुरवठा करण्यासाठी महापारेषणच्या सेन्चुरी इन्का २२०/२२ केव्ही अतिउच्चदाब उपकेंद्रात प्रत्येकी ५० एमव्हीए क्षमतेचे अतिरिक्त दोन नवीन पॉवर ट्रॉन्सफॉर्मर बसविण्याचा प्रस्ताव मुख्यालयास पाठविण्यात येणार आहे.
भोसरीमधील प्रामुख्याने औद्योगिक व इतर सर्व ग्राहकांना होणाऱ्या वीजपुरवठ्यात आणखी सुधारणा करण्यासाठी पुणे परिमंडलाचे मुख्य अभियंता राजेंद्र पवार (महावितरण) आणि राजेंद्र गायकवाड (महापारेषण) यांनी भोसरी येथील महापारेषणच्या अतिउच्चदाब उपकेंद्रासह इतर वीजयंत्रणेची संयुक्तपणे नुकतीच पाहणी केली. यावेळी अधीक्षक अभियंता सतीश राजदीप, सतीश गायकवाड व भोसरीचे कार्यकारी अभियंता उदय भोसले उपस्थिती होती.
भोसरी एमआयडीसी व इतर परिसराला वीजपुरवठा करणाऱ्या भोसरी आरएस-१ या अतिउच्चदाबाच्या २२०/२२ केव्ही उपकेंद्रामधील पॉवर ट्रॉन्सफॉर्मर्सची पूर्वीची क्षमता सध्या ४० एमव्हीएने कमी झाली आहे. परिणामी या उपकेंद्रातील तीनही पॉवर ट्रॉन्सफॉर्मर अतिभारित झाले आहेत. त्यामुळे वीजपुरवठ्यात काही वेळा अडथळे निर्माण होत आहेत. ते दूर करण्यासाठी मुख्य अभियंता राजेंद्र पवार व राजेंद्र गायकवाड यांनी वरिष्ठ अधिकाऱ्यांसह वीजयंत्रणेची पाहणी केली. यामध्ये महापारेषणच्या सेन्चुरी इन्का या २२०/२२ केव्ही उपकेंद्रामध्ये प्रत्येकी ५० एमव्हीए क्षमतेचे अतिरिक्त दोन नवीन पॉवर ट्रॉन्सफॉर्मर बसविण्याबाबत संयुक्तपणे प्रस्तावित करण्यात आले. यासंदर्भातील प्रस्ताव मुख्यालयाकडे पाठविण्यात येणार आहे.
सेन्चुरी इन्का उपकेंद्रातील नवीन पॉवर ट्रॉन्सफॉर्मरमुळे भोसरी एमआयडीसीमधील उद्योगांसह भोसरी गाव, नाशिक रोड, दिघी या परिसरात दर्जेदार वीजपुरवठा होणार आहे. सध्या असलेल्या वीजवाहिन्यांची लांबी तसेच त्यावरील वीजभार कमी होणार आहे. परिणामी वीजपुरवठा देखील विनाव्यत्यय व योग्य दाबाने सुरळीत राहणार आहे. भोसरी विभाग कार्यालयाने यासंदर्भात प्रस्ताव तयार करण्याचे निर्देश मुख्य अभियंता राजेंद्र पवार यांनी यावेळी दिले. तसेच भोसरी विभाग अंतर्गत भोसरी उपविभागामध्ये दिघी व इंद्रायणीनगरमध्ये तसेच आकुर्डी उपविभागामध्ये चिखली येथे नवीन शाखा कार्यालयांची निर्मिती करण्याचा प्रस्ताव तयार करून तो मुख्यालयाकडे पाठविण्यात येणार आहे.
