Narendra Modi : सिंधुदुर्ग : पंतप्रधान नरेंद्र मोदी यांनी आज कोकणात सिंधुदुर्ग येथे राजकोट किल्ल्यावर छत्रपती शिवाजी महाराजांच्या पुतळ्याचं अनावरण केलं. त्याशिवाय दोन मोठ्या आणि महत्त्वाच्या घोषणा केल्या आहेत. राजकोट किल्ल्यावर शिवरायांचा भव्य पुतळा उभारण्यात आला आहे. नौदल दिवसाच अवचित्य साधून छत्रपती शिवाजी महाराजांच्या पुतळ्याचं अनावरण मोदींच्या हस्ते करण्यात आलं. त्याशिवाय विविध कार्यक्रमांचं आयोजन देखील करण्यात आलं होतं.
छत्रपती वीर शिवाजी महाराज की जय, छत्रपती वीर संभाजी महाराज की जय, अशी घोषणा देत नरेंद्र मोदी यांनी आपल्या भाषणाच्या सुरुवात केली. त्यानंतर त्यांनी सिंधुदुर्गचं महत्त्व, तसेच सिंधुदुर्गातील किल्ल्याचं महत्त्व सांगितलं. मावळ्यांच्या गौरवाची गाथा सांगितली. त्यानंतर त्यांनी दोन मोठ्या घोषणा केल्या. नौदलाच्या गणवेशावर आता शिवाजी महाराजांची राजमुद्रा असेल, अशी घोषणा पंतप्रधानांनी केली. तसेच भारतीय नौदल आता आपल्या पदांची नावे भारतीय पंरपरेनुसार देणार असल्याची घोषणा नरेंद्र मोदींनी केली.
नरेंद्र मोदी नेमकं काय म्हणाले?
छत्रपती शिवाजी महाराजांकडून प्रेरणा घेऊन आज भारत गुलामीच्या मानसिकतेला मागे सोडून पुढे जात आहे. मला आनंद आहे की, आमचे नौदलाचे अधिकाऱ्यांच्या वर्दीवर छत्रपती शिवाजी महाराजांची झलक बघायला मिळेल. हे माझं भाग्य आहे की, नौदलाच्या ध्वजावर मला गेल्या वर्षी छत्रपती शिवाजी महाराजांच्या स्वराज्याशी जोडण्याची संधी मिळाली होती. आता नौदलाच्या अधिकाऱ्यांच्या अपोलेट्सवरही छत्रपती वीर शिवाजी महाराजांचं प्रतिबिंब असेल, असे नरेंद्र मोदी म्हणाले. त्याशिवाय सशस्त्र दलांमध्ये नारीशक्ती वाढवण्यावर जोर देत असल्याचे ते म्हणाले. नरेंद्र मोदी यांनी राजकोट किल्ल्याचे कौतुक करताना, मालवण तारकल्लीचा हा सुंदर किराणा, चारही बाजूने छत्रपती शिवाजी महाराजांचा प्रताप पसरलेला आहे, असे म्हटले.
कान्होजी आंग्रे, मायाजी नाईक भाटकरांचा उल्लेख
सिंधुदुर्गाच्या ऐतिहासिक किल्ल्याला पाहून प्रत्येक भारतीयाची छाती गर्वाने भरते. कोणत्याही देशासाठी समुद्र सामुग्री किती महत्त्वाची आहे याची जाणीव छत्रपती शिवाजी महाराजांना होती. जो समुद्रावर नियंत्रण ठेवतो तो सर्वात शक्तीमान आहे. त्यांनी एक शक्तिशाली नौसेना बनवली. कान्होजी आंग्रे असतील, मायाजी नाईक भाटकर असतील, असे अनेक योद्धा आजही आमच्यासाठी खूप मोठी प्रेरणा आहेत. मी आज नौसेना दिवसानिमित्ताने देशाच्या या वीरांना प्रणाम करतो असं मोदी म्हणाले.
सुरतच्या बंदरावर एकेकाळी 80 पेक्षा जास्त देशाचे जहाज असायचे
शेकडो वर्षांपूर्वी टेक्नॉलॉजी नव्हती तेव्हा सिंधुदुर्गात किल्ले बनवले. एकेकाळी सुरतच्या बंदरावर 80 पेक्षा जास्त देशाचे जहाज उभे राहत होते. भारताच्या याच सामर्थ्याच्या आधारावर दक्षिण पूर्व आशियाच्या देशांनी आपला व्यापार वाढवला. विदेशी ताकदांनी आक्रमण केलं तेव्हा आपल्या संस्कृतीवर निशाणा साधला. जो भारत जहाज बनवण्यात प्रसिद्ध होता त्याची कला, कौशल्या सर्व काही ठप्प करण्यात आलं. भारत आता विकसित होण्याच्या लक्ष्यावर जात आहे, आल्याला आपल्या गौरवाला परत आणायचं आहे. भारत ब्लू इकॉनॉमीला प्रोत्साहन देत आहे. भारत जगातील तिसऱ्या क्रमांकाची अर्थसत्ता बनण्याच्या दृष्टीने प्रवास करत आहे. अवकाश आणि समु्द्रात जगाला भारताचं सामर्थ्य दिसत आहे असं नरेंद्र मोदी म्हणाले.
भारताचा इतिहास फक्त 1 हजार वर्षाच्या गुलामीचा नाही
भारताचा इतिहास फक्त 1 हजार वर्षाच्या गुलामीचा नाही. भारताचा इतिहास विजयाचा इतिहास आहे. भारताचा इतिहास शौर्याचा इतिहास आहे. भारताचा इतिहास ज्ञान, कला, कौशल्याचा, समुद्री सामर्थ्याचा इतिहास आहे असं मोदी म्हणाले.
