पुणे, ता. १६ : शिक्षकांच्या समस्या सोडविण्यासाठी जिल्ह्यात अग्रेसर असलेल्या हवेली तालुका शिक्षक समितीच्या अध्यक्षपदी वाघोली (ता. हवेली) जिल्हा परिषद प्राथमिक शाळेतील शिक्षक पांडुरंग धर्मा शिंदे यांची निवड करण्यात आली.
अत्यंत हुशार, प्रेमळ, मनमिळावू, कार्यतत्पर, विद्यार्थी प्रेमी व शिक्षकांच्या अडचणी व्यवस्थित जाणणाऱ्या शिक्षकाची तालुकाध्यक्षपदी निवड झाल्याने हवेली तालुक्यातील शिक्षकांमध्ये आनंदाचे वातावरण निर्माण झाले आहे. मावळते अध्यक्ष सचिन हंगरगे हे शिक्षक समितीच्या दोन पदांवर कार्यरत होते. त्यामुळे समितीतील पदाधिकाऱ्यांनी त्यांना
अध्यक्षपदावरून दूर केल्याने सदर पद रिक्त झाले होते.
या पदाची निवडणूक प्रक्रिया कात्रज येथे नुकतीच पार पडली. ही निवडणूक प्रक्रिया पुणे जिल्हा शिक्षक समितीचे कार्याध्यक्ष सुनील लोणकर यांच्या अध्यक्षतेखाली पार पडली. या निवडणूक प्रक्रियेत पांडुरंग शिंदे यांची सर्वानुमते अध्यक्षपदी निवड करण्यात आली.
दरम्यान, अध्यक्षपदी पांडुरंग शिंदे यांनी निवड होताच, शिक्षक समितीच्या वतीने सत्कार करून अभिनंदन करण्यात आले. तसेच पुढील वाटचालीसाठी शुभेच्छा देण्यात आल्या. यावेळी हवेली तालुका शिक्षक समिती कार्यकारिणी व जिल्हा शिक्षक समिती प्रायोगिक तत्वावर सभासदांसाठी ओळखपत्र बनविणार आहे.
यावेळी पुणे जिल्हा शिक्षक समितीचे सरचिटणीस संदीप जगताप, प्रसिद्धीप्रमुख संजय कुंजीर, जिल्हा शिक्षक समिती पतसंस्थेचे माजी सभापती लहू ढवळे, माजी सचिव बापू तावरे, संचालक राजेंद्र जाधव, हवेली तालुका शिक्षक समितीचे माजी अध्यक्ष श्रीकृष्ण उत्पाद, मुळशी तालुका शिक्षक समितीचे माजी अध्यक्ष राजेंद्र ढगे, राजेंद्र जाधव, दीपश्री वाणी, सुजाता गुजर, अनुराधा जगताप, वैशाली घुले, विनायक गेडाम, चंद्रकांत शिंदे, प्रतीक गायकवाड, अमर गवळी, राजाभाऊ माने, रवींद्र दिवटे आदी मान्यवर उपस्थित होते. या कार्यक्रमाचे सूत्रसंचालन बापू तावरे यांनी केले, तर आभार श्रीकृष्ण उत्पाद यांनी मानले.
हवेली शिक्षक समिती बळकट करणार
‘शासनाच्या वतीने विविध योजना, धोरणे, प्रशिक्षणे राबविली जातात. त्यामुळे शिक्षकांना शालेय कामकाजासह ऑनलाईन कामकाज व प्रशिक्षण असल्याने कामाचा ताण येतो. त्यामुळे याचा विद्यार्थ्यांच्या गुणवत्तेवर परिणाम होऊ शकतो. प्रशासनाच्या माध्यमातून शिक्षकांचे प्रश्न तात्काळ सोडविण्यासाठी प्रयत्न करणार आहे. तसेच हवेली शिक्षक समिती बळकट करणार आहे.’
– पांडुरंग शिंदे, नवनिर्वाचित अध्यक्ष, हवेली तालुका शिक्षक समिती
