दुचाकी अपघातात तरुणाचा जागीच मृत्यू; शिरुर तालुक्यातील न्हावरे येथील घटना

– अक्षय टेमगिरे

रांजणगाव गणपती : शिरुर तालुक्यातील न्हावरे येथे दोन दुचाकीच्या अपघातात तरुणाचा मृत्यू झाला. ही घटना रविवारी (दि.30) जून रोजी दुपारी साडे बारा वाजण्याच्या सुमारास घडली. प्रकाश संपत शेलार (वय 37, रा.निर्वी, ता. शिरूर) असे अपघातात मृत्यू झालेल्याचे नाव आहे.

याप्रकरणी बंडू बापूराव शेलार (रा. निर्वी ता. शिरूर) यांनी शिरुर पोलीस ठाण्यात फिर्याद दिली. त्यानुसार मच्छिंद्र गोविंद माळी (वय अंदाजे 40, मूळ रा. पिंपरखेड, ता. नांदगाव, जि. नाशिक) या दुचाकीस्वाराच्या विरोधात अपघाताला कारणीभूत ठरल्याप्रकरणी गुन्हा दाखल केला आहे.

पोलिसांनी दिलेल्या माहितीनुसार, फिर्यादी बंडू शेलार यांचा पुतण्या प्रकाश न्हावरे येथून त्याच्या दुचाकीवरून (एम एच -12 -डी क्यू 9960) निर्वीकडे जात होता. यावेळी प्रकाश हा ड्रीम फिटनेस क्लबजवळ गेल्यानंतर निर्वी बाजूकडून येणाऱ्या (दुचाकी एम एच 17 के एच 3081) दुचाकीवरील मच्छिंद्र याने भरधाव वेगाने प्रकाश याच्या दुचाकीला जोराची धडक दिली. मच्छिंद्र याने निष्काळजीपणे दुचाकी चालवून समोरून येणाऱ्यास धडक दिली. या अपघातात प्रकाश संपत शेलार यांना गंभीर मार लागल्याने त्यांचा जागीच मृत्यू झाला आिहे.