पुणे : मान्सूनच्या परतीनंतर संपूर्ण महाराष्ट्रात उकाडा आणि तापमान प्रचंड वाढले आहे. सध्या राज्यात ‘ऑक्टोबर हिट’चा प्रभाव मोठ्या प्रमाणावर जाणवत असून काही भागांत उष्णतेची लाट येण्याची शक्यता निर्माण झाली आहे.आज 11 ऑक्टोबर रोजी घटस्थापनेच्या दिवशीच हवामान विभागाने किनारपट्टीच्या भागांसाठी मुख्य इशारा दिला आहे.
मुंबई, ठाणे, पालघर आणि रायगड जिल्ह्यांत प्रचंड उकाडा आणि दमट हवामान राहण्याचा अंदाज हवामान खात्याकडून दिला आहे. सिंधुदुर्ग आणि रत्नागिरीतही अशीच स्थिती असणार आहे.या सर्व भागांसाठी हवामान विभागाने ‘येलो अलर्ट’ दिला असून नागरिकांना काळजी घेण्याचे आवाहन केले आहे.
वनागपूर, अमरावती, अकोला, बुलढाणा, वर्धा, चंद्रपूर, गडचिरोली, यवतमाळ, वाशिम, भंडारा आणि गोंदिया या जिल्ह्यांसाठी कोणताही विशेष इशारा देण्यात आलेला नाही. विदर्भातील वातावरण सर्वसाधारण राहील. अकोला आणि अमरावतीत कमाल तापमान 38°C पर्यंत पोहोचू शकते.
तसेच पुणे, सातारा, कोल्हापूर, सांगली आणि सोलापूर जिल्ह्यांमध्ये हवामान पूर्णपणे कोरडे राहील. कुठेही पावसाची शक्यता नाही. पुण्यात किमान तापमान 22°C तर कमाल तापमान 36°C नोंदवले जाऊ शकते.
नाशिक, धुळे, नंदुरबार, जळगाव आणि अहिल्यानगरमध्ये पावसाची उघडीप असून हवामान कोरडे राहील. नाशिकमध्ये तापमान 20°C ते 36°C दरम्यान राहण्याची शक्यता आहे.
तर छत्रपती संभाजीनगर, जालना, बीड, नांदेड, परभणी, लातूर, धाराशिव आणि हिंगोली या संपूर्ण भागात पाऊस थांबला असून हवा कोरडी राहील. छत्रपती संभाजीनगरमध्ये पारा 38°C पर्यंत जाण्याचा अंदाज आहे.
सण-उत्सवाच्या काळात घराबाहेर पडताना पुरेसे पाणी पिणे आणि उन्हापासून बचाव करणे आवश्यक आहे.
