छत्रपती संभाजीनगर : देशभर नवरात्रोत्सवाचा आनंद आणि मातृत्वाच्या आराधनेचा उत्सव सुरू असताना, छत्रपती संभाजीनगरमधून एका अत्यंत दुर्दैवी आणि मन हेलावून टाकणाऱ्या घटनेची माहिती समोर आली आहे. एका खासगी रुग्णालयात जन्मलेल्या अवघ्या एका दिवसाच्या नवजात बालकाचा प्रसूतीमधील गुंतागुंतीमुळे मृत्यू झाला. मात्र, नवरात्रीच्या अंधश्रद्धेपोटी किंवा इतर कारणांमुळे जन्मदात्या आई-वडिलांनी आपल्याच पोटच्या बाळाला स्पर्श करण्याचे टाळले आणि त्याला परक्यांसारखे वागवले.
ही हृदयद्रावक घटना जळगाव जिल्ह्यातील एका जोडप्याशी संबंधित आहे. हे जोडपे कामानिमित्त छत्रपती संभाजीनगरमध्ये राहते. घरात नवीन पाहुणा येणार असल्याच्या आनंदाने ते कुटुंब भारावून गेले होते. प्रसूतीसाठी महिला शहरातील गजानन महाराज मंदिर परिसरातील एका खासगी रुग्णालयात दाखल झाली होती. तिने सोमवारी रात्री एका गोंडस बाळाला जन्म दिला. परंतु, प्रसूतीदरम्यान निर्माण झालेल्या शारीरिक गुंतागुंतीमुळे जन्मानंतर काही वेळातच त्या चिमुकल्याने या जगाचा निरोप घेतला.
या अकाली आणि अनपेक्षित घटनेने ते जोडपे पूर्णपणे कोलमडून गेले. परंतु, त्यानंतर घडलेला प्रकार अत्यंत क्लेशदायक होता. नवरात्रीचा काळ सुरू असल्याने, आई-वडिलांनी मृत बाळाला हात लावणेही जाणीवपूर्वक टाळले. ज्या हातांनी नऊ महिने त्या जीवाला पोटात वाढवले, त्याच हातांनी शेवटच्या क्षणी त्याला परके केले. जन्मदाता पिता देखील संपूर्ण प्रक्रियेदरम्यान अगदी तटस्थ उभा राहिला. दफनविधी पूर्ण झाल्यावर त्याने केवळ वरून थोडेसे दूध टाकले आणि तेथून निघून गेला.
अशा या कठीण प्रसंगी स्मशानभूमीत काम करणारे देवराज गायकवाड आणि रामेश्वर साबळे हे देवदूतासारखे पुढे आले. त्यांनी आपल्या मायेच्या ओलाव्याने त्या मृत अर्भकाला कुशीत घेतले आणि अत्यंत आदराने व निरोपाच्या भावनांसह अंतिम संस्कार केले. रोज मयताला आणि मृत्यूला जवळून पाहणाऱ्या त्या कर्मचाऱ्यांचे डोळेही हे भयानक वास्तव पाहून पाणावले.
नवरात्रीसारख्या पवित्र सणात माणुसकीला काळीमा फासणारी ही घटना सध्या सर्वत्र चर्चेचा विषय ठरली आहे. भावनाशून्य झालेल्या नात्यांपेक्षा माणुसकी आजही जिवंत आहे, याची प्रचिती या घटनेतून येते.
