पुणे : मेट्रोने प्रवास करणाऱ्या प्रवाशांसाठी आनंदाची बातमी आहे. सोमवारपासून (९ जून) पुणे मेट्रो मंडई स्थानकाचा नवीन प्रवेशद्वार क्रमांक ३ प्रवाशांसाठी खुले करण्यात आले आहे. यामुळे आता तुळशीबाग, दगडूशेठ गणपती मंदिर, शनिपार, बाबूगेनू गणपती अशा गर्दीच्या ठिकाणी कोणत्याही अडचणींशिवाय पोहचणे सोपे होणार आहे.
पुण्यातील मध्यभागी असलेली मंडई नेहमीच गर्दीने गजबजलेली असते. आणि त्यामुळे या ठिकाणी गाडीने जाणे व वेळेत पोहचणे कठीण आहे. अशातच आता नागरिकांसाठी हे प्रवेशद्वार अतिशय उपयुक्त ठरणार आहे. यामुळे नागरिकांना सहज मंडईत पोहचता येईल. हे प्रवेश द्वारे महात्मा फुले मंडईजवळील टिळक पुतळ्याजवळ आहे. त्यामुळे भाजीबाजारात येणाऱ्यांचीही सोय होणार आहे.
दरम्यान, रामवाडी आणि कासारवाडी मेट्रो स्थानकांवर एस्केलेटरची (पुढे सरकणारे जिने) सुविधा देखील आजपासून (९ जून) सुरु करण्यात आली आहे. या सुविधेमुळे ज्येष्ठ नागरिक, लहान मुले अशा प्रवाशांसाठी प्रवास आरामदायक आणि सुरळीत होणार आहे. यापूर्वी या स्थानकांवर जिने आणि लिफ्टची सुविधा होती. मात्र, आता या सुविधेमुळे प्रवाशांच्या आरामदायी प्रवासात आणखीनच वाढ होणार आहे.
