मुंबई : गटारी अमावस्या लवकरच आहे, या पार्श्वभूमीवर मुंबईतील सर्व पोलिस ठाण्याला एक पत्र पाठविण्यात आले आहे, या पत्राची चर्चा सध्या सोशल मीडियावर सुरु आहे. गटारी अमावस्या पोलिस ठाणे किंवा विशेष शाखेत साजरी करू नये, असा इशारा मुंबई पोलिसांनी दिला आहे.
पोलीस ठाणे हे सार्वजनिक ठिकाण असल्याने या ठिकाणी जनावरांची कत्तल करू नये, अशा सूचना मुंबईतील सर्व पोलीस ठाण्यांना देण्यात आल्या आहेत. मुंबई पोलिसांनी (Mumbai Police) गटारी अमावस्या 2022 (Gatari 2022) पोलीस स्टेशन, गुन्हे शाखा किंवा विशेष शाखेत साजरी करू नये, अन्यथा कारवाई केली जाईल, असा इशारा देण्यात आला आहे.
याला प्राणी संरक्षण संघटनांकडून विरोध होण्याची दाट शक्यता आहे. समाजात कायदा व सुव्यवस्था राखण्याची जबाबदारी पोलीस दलाची असल्याने पोलिसांनी कायद्याचे पालन केलेच पाहिजे. पोलिस ठाणी ‘सार्वजनिक जागा’ या संज्ञेखाली येतात. त्यामुळे अशा ठिकाणी जनावरांची कत्तल करणे बेकायदेशीर असून असे कृत्य करणारी व्यक्ती कायदेशीर कारवाईस पात्र आहे, असे या पत्रात म्हटले आहे.
ही प्रथा बंद करण्याच्या सूचना पोलिस दलाने दिलेल्या पत्रात देण्यात आल्या आहेत. प्रत्येक पोलीस उपायुक्तांना पोलीस स्टेशन व इतर सार्वजनिक ठिकाणी जनावरांची कत्तल होणार नाही याची दक्षता घेण्याच्या सूचना देण्यात आल्या आहेत. गटारी हा महाराष्ट्रातील मराठी दिनदर्शिकेनुसार आषाढ महिन्यात अमावस्या किंवा कोणत्याही चंद्राच्या दिवशी साजरा केला जातो.
