करमाळा तहसीलदार शिल्पा ठोकडे यांच्यावर आमदार नारायण आबा पाटील यांचा हक्कभंग प्रस्ताव; विधानसभा सभापतींकडे लेखी मागणी

करमाळा: नागपूर येथे सुरू असलेल्या महाराष्ट्र (Karmala News) विधानसभा हिवाळी अधिवेशनात करमाळा मतदारसंघातील प्रशासनिक (Narayan Aba Patil) अनियमिततेचा मुद्दा पुन्हा एकदा गाजत आहे. करमाळा विधानसभा मतदारसंघाचे विद्यमान आमदार नारायण आबा पाटील यांनी तहसीलदार शिल्पा ठोकडे यांच्याविरोधात हक्कभंग प्रस्ताव दाखल करण्याची औपचारिक मागणी केली असून हा प्रस्ताव विधानसभा विशेषाधिकार समिती अध्यक्ष आमदार नरेंद्र भोंडेकर यांच्याकडे सादर करण्यात आला आहे. (Solapur News)

आमदार नारायण पाटील स्वतः या विशेषाधिकार समितीचे सदस्य आहेत. समितीकडून हा प्रस्ताव आता विधानसभा सभापती राहुल नार्वेकर यांच्या पुढे पाठवला जाणार आहे. आमदार पाटील यांनी सभापतींना स्वतंत्रपणे लिहिती तक्रारही दिली आहे. भ्रष्टाचार, दिरंगाई आणि नागरिकांच्या तक्रारींचा परिणाम काही महिन्यांपूर्वी घेतलेल्या आमसभेत अनेक नागरिकांनी महसूल विभागातील सुरू असलेल्या भ्रष्टाचाराबाबत, कामात होत असलेल्या दिरंगाईबाबत तसेच शेतकऱ्यांना दिल्या जाणाऱ्या सेवांमधील त्रुटींविषयी गंभीर तक्रारी केल्या होत्या.

या सभेत आमदार पाटील यांनी प्रशासन अधिक गतिमान व्हावे, नागरिकांना विशेषतः शेतकऱ्यांना सन्मानपूर्वक आणि वेळेत न्याय मिळावा, असे स्पष्ट निर्देश सर्व विभागप्रमुखांना दिले होते. तथापि, अपेक्षित सुधारणा न झाल्याने महसूल विभागातील भ्रष्टाचार, शेती वादांची प्रलंबित प्रकरणे, अतिवृष्टीतील नुकसानभरपाईसाठी घेतले जाणारे कथित कमिशन, तसेच सेवा वितरणातील ढिसाळपणा या तक्रारी वाढतच चालल्या होत्या. या पार्श्वभूमीवर तहसीलदार शिल्पा ठोकडे यांच्या विरोधात हक्कभंग प्रस्ताव दाखल करण्याचा निर्णय आमदार पाटील यांनी घेतला.

 

प्रशासनात खळबळ; जनतेकडून आमदारांना पाठिंबा
आमदारांनी पूर्वीच इशारा दिला होता की, जर अधिकारी कामचुकारपणा करत राहिले तर त्यांच्या विरोधात हक्कभंग प्रस्ताव दाखल केला जाईल. परंतु परिस्थितीत सुधारणा न झाल्याने आता प्रत्यक्ष कारवाईची प्रक्रिया सुरू झाली आहे. करमाळा मतदारसंघातील इतर काही अधिकारी भ्रष्टाचार आणि हलगर्जीपणाबाबत तक्रारींच्या निशाण्यावर असल्याची माहितीही समोर आली आहे. त्यामुळे पुढील काळात आणखी काही अधिकाऱ्यांवर कारवाई होण्याची शक्यता व्यक्त केली जात आहे. आमदार नारायण आबा पाटील यांनी घेतलेल्या या आक्रमक भूमिकेमुळे स्थानिक प्रशासनात खळबळ उडाली असून, जनतेतून मात्र त्यांच्या भूमिकेला उत्स्फूर्त पाठिंबा मिळत आहे.