इराक : पूर्व इराकमधील अल-कुट शहरातील एका हायपरमार्केटमध्ये लागलेल्या भीषण आगीत ६० जणांचा होरपळून मृत्यू झाला असल्याची बातमी समोर येत आहे. या घटनेने जगभरात खळबळ उडाली असून, ही आग कशी लागली असा प्रश्न लोकांना पडत आहेत.
इराकच्या वृत्तसंस्थेने (INA) या घटनेची माहिती दिली असून, या अपघाताचा एक व्हिडिओ देखील सोशल मीडियावर व्हायरल होत आहे. ज्यामध्ये असे दिसून येते की, पाच मजली इमारतीत आगीच्या ज्वालांमध्ये जळत आहे.
वृत्तानुसार, अग्निशमन दलाचे जवान आग विझवण्यात प्रयत्न करत असून, घटनास्थळी मदत व बचाव कार्य वेगाने सुरू करण्यात आले आहे. सध्या आगीचे कारण कळू शकलेले नाही. या घटनेची चौकशी केली जात असून, ही कशी लागली याची माहिती पुढील ४८ तासांत दिली जाईल.
या घटनेबाबत एका अधिकाऱ्याने सांगितले की, ‘आम्ही आतापर्यंत ५९ मृतदेह ओळखले आहेत, परंतु एक मृतदेह इतका जळाला आहे की त्याची ओळख पटवणे शक्य नाही.’ पुढे त्यांनी मृतांच्या संख्येत वाढ होणार असल्याची शक्यता देखील वर्तवली आहे.
दरम्यान, घटनेच्या पार्श्वभूमीवर इमारतीच्या मालकाविरुद्ध गुन्हा दाखल करण्यात आला असून, या घटनेची चौकशी केली जात आहे. स्थानिक प्रशासनाने सांगितले आहे की, इमारतीची सुरक्षा व्यवस्था आणि अग्निसुरक्षा उपकरणे देखील तपासली जाणार आहेत. यात जर इमारतीच्या मालकाचा हलगर्जीपणा आढळून आला तर त्यांच्यावर कठोर कारवाई होऊ शकते.
