जालना : मुंबईमध्ये आज मराठा आरक्षणाच्या मुद्यावर सर्वपक्षीय बैठक पार पडली. या बैठकीत मनोज जरांगे पाटील यांनी उपोषण मागे घ्यावे, असे आवाहन करण्यात आले. या बैठकीनंतर अंतरवाली सराटीमध्ये उपोषण करणारे मनोज जरांगे पाटील यांनी मराठा समाजाचा अजून किती अंत पाहता, असा उलट प्रश्न केला आहे. उपोषण सुरु होऊन आठ दिवस झाल्यानंतर सरकार आता वेळ मागत आहे. आम्ही सरकारला वेळ दिला तर आम्हाला आरक्षण देणार का? असा प्रश्न देखील त्यांनी केला आहे. आपण पुढील निर्णय समाजाशी बोलून घेणार असल्याचे त्यांनी यावेळी सांगितले. ही लढाई आरपारची आजगे असं त्यांनी स्पष्ट केलं.
अंतरवाली सराटीमध्ये मनोज जरांगे पाटील यांनी सांगितले की, सरकारला अजून किती वेळ द्यायचा. मला त्यांच्यासोबत बोलण्याची अजिबात इच्छा नाही. राज्य सरकार गोर-गरिबांच्या मुलांवर गुन्हे दाखल करत आहे. तुम्हाला तुमच्या बद्दल थोडं बोललं तर वाईट वाटतं. तुम्हाला अजून वेळ कशासाठी पाहिजे, हे सांगा असेही जरांगे पाटील यांनी म्हटले. सरकारने काढलेला अध्यादेश आम्हाला मान्य नाही, तो त्यांनी रद्द करावा, अशी मागणी जरांगे यांनी केली. मराठा समाजाला आरक्षण मिळेपर्यंत आंदोलन सुरुच राहणार असून आम्हाला अर्धवट आरक्षण नको, अशी ठाम भूमिका त्यांनी यांनी घेतली आहे.
यावेळी सरकारने चर्चेसाठी आवाहन केलं असल्याबाबत त्यांना विचारले असता, तुम्ही येथे येऊन बोला. तुम्हाला गरज असेल तरच या असे मनोज जरांगे यांनी म्हटले आहे. मराठ्यांसाठी कोणताच पक्ष नाही. सर्व पक्ष एकच असल्याचे त्यांनी यावेळी सांगितले.
आम्हाला फक्त कागदं देऊन फसवू नका. मराठा आरक्षण कसं देणार, हे सर्वप्रथम सांगा असे आव्हान जरांगे यांनी राज्य सरकारला केलं आहे. गेल्या वेळी पण आरक्षण देणार, असे सर्वपक्षीय बैठकीत ठरलं होतं. पण त्यावर कार्यवाही झाली नसल्याकडे त्यांनी लक्ष वेधले.
