Lunar Eclipse 2026 : 3 मार्च 2026 रोजी वर्षातील पहिलं खग्रास चंद्रग्रहण होत असून दुपारी 3:20 ते सायंकाळी 6:46 या वेळेत ते दृश्यमान राहणार आहे. विशेष म्हणजे याच दिवशी होळीचा सण असल्याने धार्मिक आणि खगोलीय अशा दुहेरी पार्श्वभूमीवर या ग्रहणाकडे पाहिले जात आहे. श्रद्धाळू आणि खगोलप्रेमी दोघांमध्येही उत्सुकता वाढली आहे.
हे ग्रहण दुपारी सुरू होऊन सायंकाळपर्यंत दिसणार आहे. सुतक काळ सकाळी 6:20 पासून लागू होणार असून ग्रहण समाप्तीपर्यंत तो मानला जाणार आहे. धार्मिक मान्यतेनुसार सुतककाळात देवपूजा, अन्नसेवन, शुभकार्य टाळले जाते. त्यामुळे अनेक कुटुंबांनी होळीच्या दिवशी आपले नियोजन बदलण्याची तयारी केली आहे.
पुरोहित अरुण जंगम यांच्या मते, ग्रहणकाळात जप, नामस्मरण, मंत्रोच्चार किंवा ध्यान केल्यास त्याचे विशेष पुण्य मिळते, अशी समजूत आहे. ग्रहण सुटल्यानंतर स्नान करून घराची स्वच्छता करणे आणि दानधर्म करणेही परंपरेचा भाग मानला जातो.
गर्भवती महिलांनी ग्रहणकाळात विशेष काळजी घ्यावी, अशी पारंपरिक समज आहे. बाहेर जाणे किंवा धारदार वस्तू वापरणे टाळावे, असा सल्ला दिला जातो. जरी यामागे ठोस वैज्ञानिक आधार नसला तरी अनेक कुटुंबांत या प्रथा पाळल्या जातात.
अन्नसेवनाबाबतही धार्मिक नियम पाळले जातात. सुतककाळात शिजवलेले अन्न खाऊ नये, अशी मान्यता असल्याने काही जण उपवास करतात किंवा सुतक सुरू होण्यापूर्वीच स्वयंपाक उरकतात.
सायंकाळी चंद्रोदयाच्या वेळी ग्रहणाचा देखणा नजारा पाहायला मिळणार असल्याने खगोलप्रेमींसाठी हा विशेष क्षण ठरणार आहे. होळीच्या रंगोत्सवात यंदा आकाशातील हा लालसर चंद्रही वेगळाच रंग भरताना दिसणार आहे. श्रद्धा आणि विज्ञान यांची सांगड घालणारा हा दिवस अनेकांसाठी संस्मरणीय ठरण्याची शक्यता आहे.
