Loni Kalbhor लोणी काळभोर, ता. २ : पुणे–सोलापूर राष्ट्रीय महामार्गावर आज पुन्हा एकदा टँकर चालकांच्या मनमानीमुळे वाहतुकीचा बोजवारा उडाल्याचे चित्र पाहायला मिळाले. एचपीसीएल कंपनीच्या टँकरांनी सेवा रस्ता आणि मुख्य महामार्गावरच अक्षरशः रांगा लावल्याने लोणी काळभोर परिसरात सकाळपासूनच प्रचंड वाहतूक कोंडी निर्माण झाली. या कोंडीमुळे नागरिकांचे हाल झाले असून प्रशासनाविरोधात तीव्र संताप व्यक्त होत आहे. Loni Kalbhor
शनिवारी (ता. २) सकाळी सुमारे नऊ वाजल्यापासून लोणी स्टेशन परिसरात वाहनांच्या लांबलचक रांगा लागल्या. कामावर जाणारे नागरिक, शाळकरी मुले, रुग्णवाहिका आणि सार्वजनिक वाहतूकही या कोंडीत अडकून पडली. अनेकांना तासन्तास उशीर सहन करावा लागला. महामार्गावरील सेवा रस्ता हा स्थानिक वाहतुकीसाठी असताना त्याचा वापर टँकर पार्किंगसाठी होत असल्याचे स्पष्टपणे दिसून आले. मोठमोठे टँकर रस्त्याच्या कडेला नव्हे, तर थेट रस्त्यावर उभे केल्याने वाहतुकीसाठी जागाच उरलेली नव्हती. त्यामुळे मुख्य रस्त्यावरही वाहनांची कोंडी वाढत गेली आणि संपूर्ण परिसर ठप्प झाला. Loni Kalbhor
या गंभीर परिस्थितीत वाहतूक पोलिसांनी टँकर चालकांवर कठोर कारवाई करण्याऐवजी सर्वसामान्य नागरिकांच्या दुचाकी व चारचाकी वाहनांची तपासणी करून दंड वसुली करण्यात गुंतल्याचा आरोप नागरिकांनी केला आहे. “नियम फक्त सामान्यांसाठीच का? मोठ्या कंपन्यांच्या टँकरांना मोकळीक का?” असा सवाल संतप्त नागरिकांनी उपस्थित केला. Loni Kalbhor
रस्त्यावर उभे असलेले टँकर आणि कोंडीतून वाट काढणारी वाहने यामुळे अपघाताचा धोका वाढला आहे. विशेषतः रात्रीच्या वेळी ही परिस्थिती अधिक धोकादायक ठरू शकते, अशी भीती स्थानिकांनी व्यक्त केली आहे. या ठिकाणी वारंवार होत असलेल्या या प्रकारांनंतरही ठोस उपाययोजना का होत नाहीत, असा प्रश्न उपस्थित होत आहे. Loni Kalbhor
दरम्यान, लोणी काळभोर आणि हडपसर पोलिस या प्रकरणात काय कारवाई करणार, याकडे सर्वांचे लक्ष लागले आहे. नागरिकांनी तात्काळ कारवाई करून महामार्ग मोकळा करण्याची आणि टँकर चालकांवर कडक कारवाई करण्याची मागणी केली आहे. Loni Kalbhor
