लोणी काळभोर : चारित्र्य पडताळणी प्रमाणपत्र मिळवण्यासाठी मूळ भाडेकरारातील माहितीमध्ये मोबाईलवरून एडिटिंग करून बनावट भाडेकरार तयार केल्याचा प्रकार लोणी काळभोर पोलीस ठाण्यात उघडकीस आला आहे. या प्रकरणी लोणी काळभोर पोलिस ठाण्यात एकविरुद्ध गुन्हा दाखल करण्यात आला आहे.
चेतन मार्कस पवार (वय 38 , रा. यश हाईट्स, फ्लॅट नं 403, त्रिवेनीनगर, भेकराईनगर, ता. हवेली जि.पुणे) असे गुन्हा दाखल करण्यात आलेल्याचे नाव आहे. याप्रकरणी लोणी काळभोर पोलिस ठाण्यातील महिला पोलीस हवालदार वैशाली नागवडे यांनी सरकारच्या वतीने फिर्याद दिली आहे.
पोलिसांनी दिलेल्या माहितीनुसार, उमेश श्रीहरी केदार हा चारित्र्य पडताळणीसाठी अर्ज आणि आवश्यक कागदपत्रांच्या छायांकित प्रती घेऊन लोणी काळभोर पोलीस ठाण्यात 15 ऑक्टोबर रोजी आला होता. त्याच्याकडे मूळ कागदपत्रांची मागणी केली असता, त्याने आपल्याकडे एवढीच कागदपत्रे असल्याचे सांगितले. अर्जातील पत्ता कवडीपाट येथील असताना प्रत्यक्षात आपण भेकराईनगर येथे राहत असल्याचे त्याने सांगितल्याने पोलिसांना संशय आला.
पवार याने लक्ष्मीनारायण कृपा गट नं 1028, (माळवाडी कवडीपाट, कदमवाकवस्ती, ता. हवेली जि पुणे )या घराचे मालक पवार नारायण टिकाराम व भाडेकरू संदेश सोनकांबळे यांचे मुळ भाडे करारनाम्याचे पी.डी.एफ. मध्ये एडीटींग करुन त्याने उमेश श्रीहरी केदार याचे चारीत्र्य पडताळणी प्रमाणपत्र काढून देण्यासाठी मुळ दस्तऐवजात बदल करुन फसवणुक करण्याचे हेतूने अप्रामाणिकपणे व कपटीपणाने बनावटीकरण करुन, खोटा दस्तऐवज तयार करुन तो खरा असल्याचे भासवून त्याचा वापर करुन शासनाची दिशाभूल करून फसवणूक केली आहे.
पोलिसांनी संबंधित घरमालक नारायण पवार यांच्याकडे चौकशी केली असता, उमेश केदार हा आपला भाडेकरू नसून संदेश सोनकांबळे हा भाडेकरू असल्याचे त्यांनी स्पष्ट केले. यानंतर चेतन पवार याच्याकडे चौकशी केली असता, त्याने मूळ भाडेकराराच्या पिडीएफ मध्ये मोबाईलवरून एडिटिंग करून उमेश केदार याच्या नावाने करार तयार केल्याची कबुली पोलिसांना दिली आहे.
बनावट दस्तऐवज तयार करून तो खरा असल्याचे भासवून शासनाची दिशाभूल केल्याप्रकरणी चेतन पवार याच्यावर भारतीय न्याय संहिता (बी एन एस), 2023 – 318(4),336(1),336(3),339,340 गुन्हा दाखल करण्यात आला आहे. पूढील तपास लोणी काळभोर पोलिसांकडून सुरू आहे .
