पुणे : दिवाळी आणि छठपूजेच्या निमित्ताने गावी जाणाऱ्या प्रवाशांसाठी मध्य रेल्वेने दिलासादायक निर्णय घेतला आहे. या सणांच्या काळात होणारी प्रवाशांची अतिरिक्त गर्दी लक्षात घेऊन पुणे विभागातून तब्बल 450 विशेष रेल्वे फेऱ्या चालवण्याची योजना आखली आहे. या विशेष गाड्या 1 नोव्हेंबरपासून पुणे, हडपसर आणि खडकी या तिन्ही प्रमुख स्थानकांवरून धावतील. यामुळे उत्तर प्रदेश, बिहार आणि मध्य प्रदेशकडे जाणाऱ्या नागरिकांचा प्रवास अधिक सोयीचा होणार आहे.
पुणे स्थानकावरून धावणाऱ्या गाड्या
पुणे रेल्वे स्थानकावरून दानापूरसाठी दररोज विशेष ट्रेन सोडली जाईल. गाडी क्रमांक 01449 पुण्यावरून दुपारी 3.40 वाजता सुटेल, तर दानापूरहून गाडी क्रमांक 01450 पहाटे 5.00 वाजता पुण्यासाठी रवाना होईल. या मार्गावर सर्वाधिक म्हणजेच 63 फेऱ्या होणार आहेत. याशिवाय अमरावतीसाठी 7 आणि मुझफ्फरपूरसाठी 6 विशेष फेऱ्यांचे नियोजन आहे.
हडपसर स्थानकावरून गोरखपूरसाठी 32 फेऱ्या चालवल्या जातील. गाडी क्रमांक 01415 हडपसरवरून सकाळी 7.05 वाजता सुटेल आणि परतीची गाडी क्रमांक 01416 गोरखपूरवरून सायंकाळी 5.30 वाजता निघेल. हडपसरवरून नागपूरसाठी 15, गाझीपूरसाठी 12 आणि प्रयागराजसाठी 5 फेऱ्या होतील. खडकी स्थानकावरून हजरत निजामुद्दीनसाठी सायंकाळी 5.30 वाजता ट्रेन सुटेल, ज्याच्या 14 फेऱ्या होतील. तसेच खडकी-सांगानेर मार्गावर 6 फेऱ्या नियोजित आहेत.
सणांच्या काळात नियमित गाड्यांमध्ये कन्फर्म तिकीट मिळणे कठीण होते. त्यामुळे या अतिरिक्त गाड्यांमुळे प्रवाशांना मोठा दिलासा मिळेल. प्रवाशांनी प्रवासाला निघण्यापूर्वी गाड्यांची वेळ, थांबे आणि तिकिटांची उपलब्धता रेल्वेच्या अधिकृत संकेतस्थळावर किंवा आरक्षण केंद्रावर तपासून घ्यावी, असे आवाहन रेल्वे प्रशासनाने केले आहे.
